هندوستان ټایمز: هند په لومړي ځل له طالبانو سره اړیکه نیولې

هندوستان ټایمز ورځپاڼې راپور ورکړی دی چې هند د لومړي ځل لپاره د طالبانو د سیاسي دفتر د مرستیال ملا عبدالغني برادر په ګډون د دغې ډلې له مشرانو سره اړیکه نیولې ده. راپور کاږي، ډېری دغه تماسونه د هند د امنیتي چارواکو له لوري نیول شوي دي. د راپور له مخې، هند تر ډېره له هغو طالب مشرانو سره اړیکه ټینګه کړې ده چې ملي فکر لري او د پاکستان او ایران تر نفوذ لاندې نه دي. راپور کې راغلي، چې هندي چارواکو څو میاشتې مخکې له دغې ډلې سره اړیکې ټینګې کړې او اوسمهال د پراختیا په حال کې دي. ورځپاڼې د یوې سرچینې له قوله ویلي چې د ملا برادر او هندي چارواکو تر منځ تر اوسه څو څو ځله پیغامونه تبادله شوي دي خو تر اوسه هیڅ لوري هم د مخامخ لیدنې پرېکړه نه ده کړې. هندي چارواکو او طالب وسله والو تر اوسه په رسمي ډول په دې اړه څه نه دي ویلي.