واشنګټن ایکزماینر: امریکا او ناټو غواړي افغانستان کې ماتې اوکراین کې جبران کړي

ناټو او امریکا هڅه کوي افغانستان کې خپله ماتې په اوکراین کې جبران کړي. واشنګټن ایکزماینر په یوه اوږده تحلیل کې ویلي چې ناټو د خپل تاریخ تر ټولو ستره او شرمناکه ماتې په افغانستان کې وخوړه او دې مسئلې د ناټو سازمان نړۍ ته یو کمزوری سازمان معرفي کړ. سرچینه زیاتوي چې ددې تر څنګ بایډن په افغانستان کې د رامنځ ته شوي وضعیت له امله ځان ته د امریکا د ناکام ولسمشر لقب خپل کړی او په نړۍ کې یې د امریکا موقف ته سخته ضربه رسولې ده. په دې مطلب کې راځي له همدې امله امریکا او ناټو په ګډه هڅه کوي چې د اوکراین وضعیت کنټرول کړي او افغانستان کې خپله سترې ماتې په اوکراین کې جبران کړي. سرچینه کاږي د ناټو او امریکا سیاستوال په دې باور دي چې که د اوکراین جګړه له روسیې وګټي نو خپل بایللی حیثیت به بیا ترلاسه کړي، نو له همدې امله یې هر ډول مرستې او کمک ته ټټر وهلی څو اوکراین د روسیې پر وړاندې بریا ترلاسه کړي.