ولسمشر غني:طالبان په خپل روایت او د جګړو له لارې موخو ته نه شي رسېدلی

ولسمشر غني وایي طالبانو په وروستیو کې تاوتریخوالی ډېر کړی دی او دا په دې مانا ده چې دوی پر تاوتریخوالي باوري دي او د جګړو له لارې موخو ته د رسېدو هڅه کوي. نوموړي چې نن یې تر شپږ کاله ځنډ وروسته د لومړي ځل لپاره مکمله کابینه ولسي جرګې ته ور معرفي کوله وویل، افغانان د سولې تږي دي خو طالبانو ثابته کړې چې دوی یوازې د جګړو له لارې موخو ته د رسېدو هڅه کوي او پر خپل روایت په فتح باوري دي. هغه ویلي طالبان هېڅ وخت پر خپل رامنځ ته کړي روایت بریا ته نه شي رسېدلی بلکې د جګړو د پای ته رسولو یوازینۍ لار مذاکراتو ته ادامه ورکول او د تاوتریخوالي کمول دي. ولسمشر غني یو ځل بیا په هلمند او غور ولایتونو کې د طالبانو بریدونه وغندل او په خبره یې یادو بریدونو وښوده چې طالبان د افغانانو غوښتنې ته درناوی نه کوي. ولسمشر غني دغه راز وویل چې افغانستان یوازې نه دی او طالبان دې دا خوبونه هېر کړي چې د بهرنیو ځواکونو تر وتلو وروسته به خپلو اهدافو ته ورسېږي. دده په وینا نړیواله ټولنه او د افغانستان ستراتيژیک ملګري شته تړونونو ته ژمن دي او په افغانستان کې د تېرو کلونو د لاس ته راوړنو په ساتلو کې پوره همکاري کوي. هغه ویلي امریکا دا ډاډ ورکړی چې د افغان ځواکونو ملاتړ ته ادامه ورکوي او په خبره یې په جینوا کنفرانس کې به نړیوال له افغانستان سره خپلې ژمنې یو ځل بیا تازه کړي.