د ولسمشر غني او ډاکتر عبدالله عبدالله ترمنځ د هوکړې پر اساس چې کله ګډ حکومت جوړېده، نو د ملي مصالحې عالي شورا هم د دغه حکومت په ترکیب کې شامله شوه. ډاکتر عبدالله عبدالله د دې شورا رییس وټاکل شو او پرون یې خپله لومړنۍ غونډه ترسره کړه. د ملي مصالحې عالي شورا د رهبرۍ شورا غونډه تېره ورځ د ولسمشر غني به خبرو پیل شوه چې د سولې پر راوستو یې ټینګار کاوه. د شورا په افتتاحیه غونډه کې ټینګار وشو، چې د سولې په لار کې باید ټول خنډونه ختم کړل شي. ولسمشر غني بیا د اوربند غوښتنه وکړه او پر طالبانو یې غږ وکړ چې د ولس غوښتنو ته درناوی وکړي.
څو میاشتې کېږي چې د ملي مصالحې عالي شورا جوړه شوې وه، خو تېره ورځ یې لومړنۍ ناسته وه. په دې ناسته کې ولسمشر غني، د ملي مصالحې عالي شورا رییس ډاکټر عبدالله عبدالله، پخواني ولسمشر حامد کرزي، جهادي شخصیت استاد سیاف، د کابینې غړو، د ولسي جرګې غړو او د نورو اقشارو استازو ګډون کړی و. غونډه ولسمشر غني په خپله وینا پیل کړه او له ټولو هغو کسانو یې مننه وکړه چې په دې غونډه کې یې ګډون کړی دی.
ولسمشر غني د خپلو خبرو په دوام د سولې په اړه اوسنی فرصت، سیمهییزه او نړیواله اجماع او ملي یووالی خورا مهم وبلل او په وینا یې، افغان حکومت دې هر څه ته متوجه دی او هڅه کوي چې روانه جګړه ژر تر ژره ختمه شي. ولسمشر دغه راز وویل چې په دوحه کې مېشت افغان پلاوی د حکومت له بشپړ ملاتړ برخمن دی او حکومت یې پرېکړو ته درناوی لري. هغه یو ځل بیا پر طالبانو غږ وکړ چې جګړې کمې کړي، اوربند ته غاړه کېږدي او په خبره یې، حکومت په مذاکراتو کې جدي دی، نو طالبانو ته هم په کار ده چې جدیت غوره کړي، له جګړو لاس په سر شي او اوربند وکړي. د ده په خبره: ((موږ جدي یو، د خبرو لپاره ښه جدي یو او طالبانو ته هم په کار ده چې جدیت وښيي او له اوربند دې نه وېرېږي)).
ولسمشر غني همدا راز وویل چې طالبان د افغانستان د ټولنې یو واقعیت دی او افغان حکومت له طالبانو سره د مذاکراتو لپاره خورا مهمې پرېکړې کړې دي، زندانیان یې خوشي کړي او په خبره یې، که اړتیا پېښه شي، نو حکومت تیار دی چې نور خنډونه هم له منځه یوسي. هغه د سولې په اړه سیمهییزه اجماع هم خورا مهمه بللې او په خبره یې، افغان حکومت هڅه کوي، څو نړیوال په دې باوري کړي چې افغان جګړه یوازې د خبرو له لارې د حل وړ ده او په دې توګه به نړیواله اجماع نوره هم پیاوړې کړل شي.
له دې سره جوخت د ملي مصالحې عالي شورا رییس ډاکتر عبدالله عبدالله هم وویل چې د دغې شورا ستره موخه د سولې راوستل دي. د ده په وینا، دی ځکه دلته دی چې غواړي افغانان د سولې هيلې ته ورسوي او دلته ۴۰کلنه جګړه له ممکنه لارو ختمه کړي. ډاکتر عبدالله عبدالله هم د سولې او روغې جوړې لپاره سیمهییزه او نړیواله اجماع مهمه بللې او په خبره یې، د سیمې د هېوادونو همکاري د افغان سولې په پروسه کې خورا مهمه ده.
پخواني ولسمشر حامد کرزي هم په دې غونډه کې خبرې وکړې او په خبره یې، دوی هیله لري چې په دوحه کې مېشت مذاکراتي پلاوي ژر تر ژره یوې پایلې ته ورسېږي او په دې توګه په کور د ننه روانه جګړه د خبرو له لارې پای ته ورسوي. هغه دلته روانه جګړه پردۍ او د پردیو دسیسه بللې او په خبره یې، د دې وخت دی چې افغانان ژر تر ژره په خپلو کې سوله وکړي.
په دې غونډه کې ګڼو نورو سیاسي څېرو هم خبرې او څرګندونې لرلې او ټولو د سولې له روان بهیر ملاتړ وکړ او په دې مهمه پروسه کې یې د افغانانو پر یووالي او همغږۍ ټینګار کړی دی.
