ټام ویسټ د افغانانو ترمنځ پر سیاسي ډایلوګ ټینګار کړی دی

د افغانستان لپاره د امریکا ځانګړي استازي ټام ویسټ له هندي چارواکو سره تر لیدنې وروسته د افغانانو ترمنځ پر سیاسي ډایلوګ ټینګار کړی دی. هغه پر خپله ټویټر پاڼه لیکلي چې پرون يې په نوي ډيلي کې د هندوستان د ملي امنیت د سلاکار مرستال ويكرم مصري، د بهرنیو چارو وزارت د افغانستان او پاکستان د څانګې مشر جي پي سينګ او د بهرنیو چارو وزارت ویاند ارېندم باګچي او يو شمېر نورو چارواکو سره لیدلي دي. ویسټ زياته کړې چې له دغو هندي چاراکو سره يې په افغانستان کې د دواړو هېوادونو پر ګډو ګټو خبرې او بحثونه وکړل. نوموړي له افغانستان او افغانانو سره د هندوستان له بشري مرستو او د افغانانو له بنسټيزو حقونو څخه د هند له ملاتړ څخه مننه کړې ده. ټام ويسټ د افغانانو ترمنځ پر سیاسي ډیالوګ ټینګار کړی او ویلي چې په دې اړه د نړیوالې ټولنې په مينځ کې اجماع شته چې افغانان ددې نوښت مشري په غاړه واخلي. له ويسټ سره په دې سفر کې د افغانستان لپاره د امریکا د سفارت شارژدافیرې مېرمن کرن ډیکر هم ملتیا کوله.