ټولګټو وزارت: هېواد کې د څه باندې ۱۷۳ پروژو کار جریان لري

ټولګټو چارو وزارت وايي، روان کال په ټول هېواد کې د سړکونو، لویو لارو د رغونې، ساتنې او څارنې، اجناسو او غیرمشورتي خدمتونو په برخه کې د څه باندې ۱۷۳ پروژو کار جریان لري. یاد وزارت زیاته کړې، چې په دغو پروژو کې ۱۵زره او ۱۷ تنو ته په مستقیم ډول د کار زمینه برابره شوې ده. دغه وزارت ویلي، د دغو پروژو له ډلې یو شمېر د کابل – کندهار لويې لارې د بیارغونې، کندهار- هرات، غور- هرات، کندهار- ارزګان لويې لارې د رغونې، د سالنګونو لویي لارې د اساسي رغونې او دځینو نورو لارو د ترمیم او بیارغونې چارې شاملې دي. په ورته مهال دې وزارت ویلي، په ټول هېواد کې د سړګونو د ساتنې او څارنې ۱۰۹ پروژو کار پیل شوی، چې د ۷۶ لګښت یې له پراختیايي او د ۳۳ نورو یي له عادي بودیجې څخه ورکول کېږي. د ټولګټو وزارت د معلوماتو له مخې په دغو پروژو کې شاوخوا ۲۵ پايې لوی پلونه او د ګڼ شمېر نورو پلګوټو کارونه هم شامل دي چې د ځینو چارې بشپړې او ګټې اخیستنې ته سپارل شوي دي.