پاکستان وایي د افغانستان له لارې یې منځنۍ اسیا ته صادرات ډېر شوي دي. د پاکستان د سوداګرۍ وزارت په تازه څرګندونو کې ویلي چې له افغاستان سره تر ځینو اقتصادي موافقو وروسته یې ددغه هېواد له لارې منځنۍ اسیا ته په صادراتو کې د پام وړ ډېروالی راغلی دی.
سرچینه همدا راز وایي چې افغانستان ته یې صادرات کم شوي دي خو له افغانستان یې په وارداتو کې ډېروالی راغلی دی. د پاکستاني حکومت په خبره دوی تېر کال د ۵۵۰ میلیونو ډالرو په ارزښت له افغانستان واردات ترسره کړي وو، چې اوس دا شمېره ۷۰۰ میلیونه ډالرو ته رسېدلې ده.
پاکستان همدا راز د افغانستان له لارې منځنۍ اسیا ته د ۲۲۰ میلیونو ډالرو په ارزښت صادرات لرلي دي چې د تېر کال په پرتله پنځوس سلنه ډېروالی ښيي.
