پاکستان د افغان کډوالو د ایستلو لپاره درې نورې لارې خلاصوي

د پاکستان حکومت غواړي له افغانستان سره پر ډیورنډ فرضي کرښه درې نورې لارې پرانیزي، چې له دغه هېواده د افغان کډوالو د اېستلو بهیر چټک کړي. د پاکستان ډان ورځپاڼې خبر ورکړى، چې نوې لارې به نن پرانيستل شي. په دغه راپور کې دا هم ویل شوي، هغه بنسټونه چې د کډوالو د اېستلو مسوولیت لري د کډوالو د هویت په ثبت او پروسس کې له ستونزو سره مخ دي. د پاکستاني رسنیو د خپرو شویو رسمي راپورونو له مخې، ۸۸ زره کډوال یوازې د چمن له لارې افغانستان ته ستانه شوي دي. د سند حکومت د افغان کډوالو شتون د دې ایالت لپاره د نفوسو د ډیریدو ګواښ بللی او خبرداری یې ورکړی چې که کډوال بیرته خپلو هیوادونو ته وا نه ستول شي نو تر ۲۰۴۰ کال پورې به د دغه ایالت په اجتماعي هویت بدل شي. په دغه راپور کې ویل شوي چې په سند کې شاوخوا یو لک او ۵۰ زره افغانان د اوسېدو له اسنادو پرته ژوند کوي.