پنجشېر کې په څوارلسم ځل څه کم ۷ زره قیراطه زمرد وپلورل شول

د پنجشېر د کانونو او پټروليم رياست مسوولینو نن د دغه ولايت له کانونو د تازه استخراج شویو زمردو د پلورلو خبر ورکړی دی. د دغه ولایت د کانونو او پټروليم رييس محمد قاسم اميري وايي، چې د څوارلسم ځل لپاره د هېواد پر سوداګرو ۶ زره ۸۸۷ قيراطه زمرد د ۲۱۷ زره او ۲۵۰ ډالرو په ارزښت د کانونو د څارنې کمېټې، د سیمه ییزو چارواکو او سوداګرو په شتون کې د داوطلبۍ له لارې وپلورل شول. امیري زیاته کړه، چې تر دې وړاندې هم د هېواد پر سوداګرو ۲ زره ۸۶۷ قيراطه زمرد د ۲۹۶ زره او ۷۵۰ ډالرو په ارزښت پلورل شوي وو.