پنټاګون: طالبان د تاوتریخوالي کمولو ژمنو کې پاتې راغلي

د امریکا دفاع وزارت وايي، د بایډن اداره په دې باور ده چې له طالبانو سره په شوي تړون مخکې تګ به ستونزمن وي مګر دا چې دغه ډله د ۲۰۲۰ کال د تړون په ژمنو عمل وکړي، که څه هم واشنګټن دې هڅې ته ژمن دی. د پنټګان ویاند جان کربي خبریالانو ته وویل، بې له دې چې طالبان پر خپلو ژمنو عمل وکړي تر څو ترهګري پرېږدي، او په افغان امنیتي ځواکونو باندې بریدونه ودروي، نو دا ډېره سخته ده چې د شوي تړون د ساتلو لپاره ځانګړې لاره ولیدل شي. کربي زیاته کړې تر اوسه پورې داسې نه ښکاري چې طالبانو دې په سمه توګه پر خپلو ژمنو عمل کړی وي. نوموړي وویل، چې د ولسمشر جوبایډن د ادارې لخوا په افغانستان کې د امریکايي سرتېرو د راتلونکي شمېر په اړه څه نه دي ویل شوي. امریکايي ډیپلوماتانو اندېښنه ښودلې چې د تاوتریخوالي زیاتېدل به د طالبانو لخوا هغه باور او ډاډ زیانمن کړي چې د سولې خبرو د بریا لپاره اړین وي.