په اروزګان کې د پستې باغونو جوړولو ته لېوالتیا ډېره شوې

د ارزګان ولايت کروندګر وايي، په خپلو ځمکو کې يې د پستې باغونو جوړونې ته مخه کړې ده. د دغه ولايت د کروندګرو په وينا، له تېرو درېیو کلونو راهیسې يې په خپلو ځمکو کې د پستې بوټي کینولي؛ خو زیاتوي چې پستې یې بازار نه لري او نه هم په دې برخه کې دوی ته مسلکي روزنه ورکړل شوې ده. د نوموړي ولایت د مرکز ترينکوټ يو کروندګر اغاولي وايي چې د پستې له جوړ شوي باغ يې سږ او همداراز تېر کال ښه حاصلات ترلاسه کړي دي. دی وايي، که څه هم دوی د پستې په باغونو کې د ښه حاصلېدو په هدف زياتې خوارۍ کړي؛ خو په وينا يې چې په دې وروستیو کې د دغې میوې بازار سوړ دی او سم بازار نه لري.