په بلوچستان کې؛ د وژل شوو کان کېندونکو له ډلې اووه کسه یې افغانان دي

د هېواد د بهرنیو چارو وزارت له لوري په خپره شوې اعلامیه کې راغلي چې افغان حکومت په بلوچستان کې د داعش ډلې له لوري د اوو افغان کان کېندونکو پر وژل کېدو خپله ژوره خواشیني څرګندوي. سرچینه وايي افغان حکومت دغه پېښه غندي او له پاکستاني حکومت غواړي چې عاملین یې ژر تر ژره ونیسي. بهرنیو چارو وزارت همدا راز وایي په کوټه کې افغان ديپلوماتیکې ادارې ددغه پېښې په څېړنو لګیا دي او پر وخت به ټولې اړینې همکارۍ وکړي. افغان حکومت د قربانیانو له کورنیو سره هم خپله خواږي شریکه کړې ده. دغه پېښه وړمه ورځ په بلوچستان کې شوې ده او وسله والو شاوخوا یولس کان کېندونکي لومړی تښتولي او بیا یې وژلي وو.