په تېره یوه اونۍ کې پاکستان کې ۸۰۰ افغان کډوال نیول شوي

د پاکستان په کراچۍ ښار کې د افغانستان د سرپرست حکومت سرکونسل عبدالجبار تخاري وايي چې د تېرې یوې اونۍ په لړ کې په پاکستان کې څه باندې ۸۰۰ افغان کډوال نیول شوي دي. تخاري ویلي چې د نیول شویو کسانو په منځ کې ماشومان هم شامل دي او ډېری دغه کسان له سند ایالته نیول شوي دي. له پاکستانه د افغان کډوالو د ایستلو په تړاو د دغه هېواد د لنډمهالي لومړي وزیر له څرګندونو وروسته، اوس یو شمېر افغان کډوال د پاکستان حکومت له لوري په اسلام اباد او ځینو نورو ښارونو کې د افغان کډوالو د نیونو له زیاتېدو خبر ورکوي. د عبدالجبار تخاري په وینا، هغه ۲۰۰ افغان کډوال چې په دې وروستیو کې نیول شوي وو د سرپرست حکومت د کونسلګرۍ د هڅو له امله بېرته خوشې شوي خو د نیولو دغه بهیر اوس هم دوام لري. له دې سره سم، سرپرست حکومت له پاکستانه غواړي چې له افغان کډوالو سره ښه چلند وکړي.