پکتیکا کې ۲۲ زره ماشومانو ته د زده کړو زمینه برابره شوې

د پکتيکا ولايت په ۱۵ ولسواليو کې د افغانستان لپاره د سويډن کمېټې له لوري د نږدې ۷۰۰ ټولګیو په جوړېدو سره، څه باندې ۲۲ زره ماشومانو ته د زده کړو زمینه برابره شوې چې ۱۴ زره یې نجونې دي.  یو شمېر زده کوونکي او د هغوی کورنۍ د دغو ټولګیو په جوړېدو سره خوښ دي، خو غوښتنه کوي چې دوی ته دې دایمي ښوونځي جوړ شي. د دې ټولګيو ښوونکې وايي د سيمې خلک تر ډېره لېواله دي چې خپلې لوڼې په ټولګیو کې شاملې کړي، خو دوی یې د ځایېدو ظرفیت نه لري. د دغه ولايت د پوهنې رياست مسوولین یې هم هرکلی کوي او وايي د امکاناتو د شتون په صورت کې به په محرومو سيمو کې ښوونځي جوړ کړي. دا غوښتنې داسې مهال مطرح کېږي چې د سرپرست حکومت له لوري تر دویم امر پورې له شپږم ټولګي پورته د نجونو ښوونځيو او پوهنتونونو دروازې تړلې دي او د نوي ښوونیز کال په نږدې کېدو سره لا هم روښانه نه‌ده چې دا دروازې به پرانیستل شي که نه‌.