چارواکي: د بخش اباد بند د چارو بشپړولو کې له ټولو امکاناتو ګټه اخلو

د ریاست الوزرا اقتصادي مرستیال د بخش اباد بند د کارونو په پرانیسته غونډه کې ویلي، چې د دې بند د پاتې چارو په بشپړولو کې له ټولو امکاناتو ګټه اخلو. نوموړي له قراردادي شرکت هم غوښتي، چې ورسپارل شوې چارې په پوره اخلاص او امانتداري سره بشپړې کړي. نوموړي ویلي، چې دا بند د فراه ولایت لپاره یوه مهمه او حیاتي پروژه ده.ده ټینګار کړی، چې په ټول توان د دې پروژې په بشپړولو کې د فراه ولس تر څنګ ولاړ دي. غونډې ته د اوبو او برېښنا سرپرست وزیر ویلي، سرپرست حکومت له شته امکاناتو په ګټه اخیستلو هڅه کوي، چې هېوادوالو ته د هوسا ژوند زمینه برابره کړي.