چارواکي: نړیوال دې د چاپېریال ساتنې او اقلیم برخه کې مرسته وکړي

د سرپرست حکومت د سیاسي کمېسیون پرېکړې کړې چې د اقلیمي بدلونونو اغېزو کمولو او چاپېریال ساتنې لپاره دې له نړۍوالو تخنیکي تجربو ګټه واخيستل شي او له نړۍوالو یې غوښتي چې په دې برخه کې مرسته وکړي. د حکومت د رسنیو مرکز په خبرپاڼه کې راغلي چې تېره ورځ د سیاسي کمېسیون د ریاست‌الوزراء سیاسي مرستیال په مشرۍ د چاپېریال ساتنې، چاپېریال ته د ورپېښو ګواښونو او د هوا تودوخې پر موضوعاتو بحث وکړ. سرچينې لیکلي، په دې غونډه کې چې د چاپېريال ساتنې ادارې مشرتابه او متخصصينو هم حضور درلود، د اقليمي بدلونونو پر اصلي عواملو، له بدلونونو سره پر مبارزې او د تودوخې پر ډېرېدو بحث او نظرونه تبادله شول. سرچينه کاږي، په دې غونډه کې وويل شول، اقلیمي بدلون پر نړۍ، په ځانګړې توګه هغو ټولنو چې ژوند یې له طبيعي سرچینو پر استفادې ولاړ دی، ډېر منفي اغېز کړی او پرېکړه يې کړې چې د اقليمي بدلونونو اغېزو کمولو او چاپېريال ساتنې لپاره دې له نړۍوالو تخنيکي تجربو استفاده وشي.