ډبلیو‌اف‌پي: افغانستان کې مو فعالیتونه د درېدو له ګواښ سره مخ دي

د خوړو نړیوال سازمان وایي چې د بودجې د کموالي له امله یې په افغانستان کې د مرستې رسوونې عملیات د درېدو له ګواښ سره مخ دي. دا خبره ډبلیو‌اف‌پي تېره ورځ ناوخته پر خپل ټویټر کړې ده. دغې ادارې ویلي چې تر اوسه پورې یې د نړیوالو مرستندویانو په ملاتړ ۲۳ میلیونه اړمنو افغانانو ته مرستې رسولې دي. یاد سازمان تر دې وړاندې خبرداری ورکړی و چې د اوکراین ناورین به د افغانستان پر وضعیت هم ناوړه اغېز ولري او ممکن په دغه جګړه ځپلي هېواد کې د خوراکي توکو بیې لوړې کړي. د یادونې ده چې دغې ادارې یو ځل مخکې هم ویلي وو چې تر اوسه پورې یې په افغانستان کې اړمنو سره د مرستې په موخه یو میلیارد ډالر مصرف کړي دي او خپلې موخې ته د رسېدو لپاره ۱.۶ میلیارد ډالرو ته اړتیا لري.