ډبلیو اېف پي: راستانه شوي افغان کډوال بېړنیو مرستو ته اړتیا لري

په افغانستان کې د ملګرو ملتونو د خوړو نړیوال پروګرام وايي چې څه باندې نیم میلیون افغانان چې له پاکستان څخه را اېستل شوي، بیړنیو مرستو ته اړتیا لري. د خوړو نړیوال پروګرام پر خپلې ټویټر پاڼې لیکلي، ډېری هغه افغانان چې په زوره له پاکستان څخه را اېستل شوي، له هېڅ ډول عاید او اقتصادي ملاتړ څخه ژوند کوي. دغه پروګرام زیاته کړې چې له پاکستان څخه را ګرځېدونکي کسان د ژوند بیا جوړولو لپاره لا ډېرو مرستو ته اړتیا لري. د ورکړل شویو شمېرو له مخې، له هغې راهیسې چې پاکستان هلته مېشتو ناقانونه افغان کډوالو ته د وتلو وخت وټاکه، څه باندې ۵۰۰ زره افغانان په یو ډول نه یو ډول له دغه هېواد څخه را اېستل شوي دي.