کابل هوايي ډګر کې د سوداګرو انتظار خونه ګټې اخیستنې ته وسپارل شوه

د ټرانسپورټ او هوايي چلند وزارت له خوا د کابل په هوايي ډګر کې د سوداګرو د انتظار خونه ګټې اخیستنې ته وسپارل شوه. د یاد وزارت مسوولینو د دغو مراسمو په لړ کې د کابل هوايي ډګر د ننوتو دروازې د بنسټ ډبره هم کېښوده. د دغه وزارت مرستیال له سوداګرو او پانګوالو غواړي چې د هېواد د هوايي ډګرونو د ښکلا په برخه کې له یاد وزارت سره همکاري وکړي. اخوا، د کابل د هوايي ډګر رییس عبدالهادي محمد وايي اوس مهال د هېواد ګڼې برخې بیارغونې ته اړتیا لري او د ټولو ګډه همکاري کولای شي چې په دې برخه کې ښې پایلې ورکړي. د ټرانسپورټ او هوايي چلند وزارت د معلوماتو له مخې، اوس مهال په هېواد کې ۲۷ هوايي ډګرونه فعال دي چې له منځه یې د کابل، مزار شریف، هرات او کندهار له هوايي ډګرونو بهرنۍ الوتنې هم کېږي.