سره له دې چې په دوحه کې بین الافغاني خبرې پيل شوې دي، خو په کابل او ولایتونو کې بیا وضعیت بل ډول دی. هره شپه سختې جګړې، پر لویو لارو د طالبانو مانورونه، پر ولسوالیو بریدونه، د سړک غاړې ماینونه او د افغان حکومت له لوري هوایي بریدونه هغه څه دي چې د افغان ولس له سترګو یې خوب او له ژوند ارام وړی دی. لوی ښارونه بیا د جګړو تر څنګ د پراخو جنایي جرمونو له درکه هم له سترو خطرونو سره مخ دي. طالبانو بیا تازه د کابل ښار په ورودي لارو کې مانورونه کړي او ادعا کوي چې په کابل ښار کې د غلو د سترو شبکو پر وړاندې فعالیت کوي.
هغه مهال چې په دوحه کې بین الافغاني خبرې پیل شوې، د ولس ستره هیله دا وه چې په هېواد کې به روانه جګړه ختمه شي او یا به دایمي اوربند رامنځ ته شي، خو خبره برعکس ده. طالبانو او افغان حکومت د یو بل پر وړاندې عملیات پراخ کړي دي او جګړې شدیدې شوې دي. افغان حکومت طالبان ملامت بولي او د تاوتریخوالي د ډېرېدو پړه پر دوی اچوي، خو طالبان بیا وايي چې حکومت په ګڼو ښارونو کې په لویو عملیاتو لاس پورې کړی او دوی اړ دي چې پر وړاندې یې مقاومت وکړي. طالبانو د خپلو جګړو په دوام د بامیانو او پنجشیر په څېر په امنو ولایتونو کې هم بریدونه کړي او ځان فعال ښيي.
تازه وړمه شپه طالبان د کابل ولایت د پغمان ولسوالۍ د غلام حیدرخان کلا سیمه کې د کابل کندهار لویې لارې ته راوتلي دي. دا د کابل ورودي دروازه ده او هره ورځ زرګونه موټرونه، حکومتي کاروانونه، مسافر او عام خلک پر دې لار تګ راتګ کوي. طالبانو په همدې سیمه کې ویډيويي فلم ډک کړی او په هغه کې د دې ډلې یو قومندان چې ځان د ښاري عملیاتو غړی معرفي کوي، له موټر چلوونکو پوښتنې کوي. هغه ادعا کوي چې په دې سیمه کې وسله وال غله پیدا شوي او له خلکو یې مالونه او پیسې اخیستې، نو ځکه دوی راوتلي چې د دغو غلاوو مخه ونیسي. طالبانو تر دې وړاندې د غزني په قره باغ ولسوالۍ کې هم د هغو وسله والو غلو پر وړاندې عملیات کړي وو، چې د یوه موټر د مسافرو توکي یې لوټ کړي وو او له مېرمنو سره یې غیر اخلاقي چلند کړی و.
ښايي دا لومړی ځل وي چې طالبان په داسې ښکاره توګه د کابل په دومره مهمه سیمه کې پر سړکونو درېږي او له خلکو پوښتنې کوي. په دې سیمه کې نږدې د افغان پوځیانو پوستې هم پرتې دي او کوم موټرونه چې کابل ته ننوځي، د دوی له لوري تالاشي کېږي هم. دې مسئلې د کابل اوسېدونکو ته اندېښنې پیدا کړې او د حکومت وضعیت یې له پوښتنې سره مخ کړی دی. یوازې دا نه په کابل ښار کې وسله والې غلاوې او جنایي جرمونو نور هغه څه دي چې ژوند یې له ستر خطر سره مخ کړی دی. په کابل ښار کې د ننه ښايي هېڅ داسې کورنۍ نه وي پاتې چې پخپله یا یې خپلوان له وسله والو غلو سره نه وي مخ شوی او یو څه یې ترې وړي نه وي. همدا څو ورځې وړاندې د کابل امنیه قومندانۍ وویل چې ۱۹ وسله وال غله یې په کابل ښار کې نیولي دي. له دې اټکل کولی شئ چې په دغه ښار کې جنايي جرمونه او وسله وال غله په څه وضعیت کې دي.
د کورنیو چارو وزارت بیا وایي چې دوی د امنیتي میثاق په رامنځ ته کولو بریالي شوي چې د کابل ګڼې سیمې امن کړي، خو سره له دې هم په کابل ښار کې ورځ تر بلې د جنایي جرمونو ډېرېدل د اندېښنې وړ دي. دې هر څه د حکومت په اړه هم اندېښنې ولاړې کړې دي، په دوحه کې د بین الافغاني خبرو پایلې ته نه رسېدل، په کابل او ولایتونو کې سختې جګړې او د دې ټولو پر وړاندې د حکومت چوپتیا او بې پروايي د ولس لپاره ځورونکې او د پوښتنې وړ مسئله ده.
