کابل کې د امریکايي ځواکونو کمپ دفاع وزارت ته وسپارل شو

له افغانستان څخه د بهرنیو سرتېرو د وتلو سره هممهاله په کابل کې د نړیوالو ځواکونو، نوی کابل کمپ د ملي دفاع وزارت ته وسپارل شو. د دفاع وزارت مرستیال ویاند فواد امان ویلي، چې د دغه پوځي کمپ د سپارلو په مراسمو کې د دفاع وزارت مرستیال او په افغانستان کې د امريکايي ځواکونو عمومي قوماندان جنرال سکاټ میلر هم ګډون درلود. د دفاع وزارت د معلوماتو له مخې، د غوڅ ملاتړ ماموریت له ځواکونو څخه افغان ځواکونو ته د انتقال او د اډو سپارلو بهیر په بریالۍ توګه د عملي کېدو په حال کې دی. له دې مخکې هم بهرنیو پوځیانو په یو شمیر ولایتونو کې خپلې پوځي اډې افغان ځواکونو ته سپارلې دي.