کاپیسا کې د اوبو لګولو د ۹ پروژو چارې پیل شوې

د کاپیسا د اوبو او انرژۍ ریاست مسوولین وایي چې د روان مالي کال په دویمه ربعه کې د اوبو لګولو د  ۹ پروژو چارې  د نږدې ۱۱ میلیونه افغانیو په لګښت پیل شوې دي. د یاد ریاست رییس حجت الله زبیر ویلي، چې د یادې پروژې چارې د «یو ان ډي پي» ادارې په مالي ملاتړ د مرکز په ګډون، تګاب او نجراب ولسوالیو کې پلې کېږي چې له دې دلې څخه د یوې پروژې چارې بشپړې او د ۸ نورو پروژو چارې د بشپړېدو په حال کې دي. نوموړي زیاته کړې، چې د یادو پروژو په پلې کېدو سره ۷۲۰ کسانو ته د کار زمینه برابره شوې او د ۱۷۳ جریبه کرنیزې ځمکې د ویجاړېدو مخه نیول شوې ده.