کای آیده: ملګري ملتونه باید په افغان سوله کې فعال رول ولوبوي

ښايي اروپايي ټولنه په افغانستان کې د امریکا د ځینو خپلسریو مخالفت وکړي. په افغانستان کې د ملګرو ملتونو پخواني استازي کای آیډه په خپله تازه مرکه کې ویلي امریکا نه شي کولی د خپلو سرتېرو د ایستلو او یا له جګړې د ځان د خلاصولو لپاره هغه لاس ته راوړنې په افغانستان کې تر پښو لاندې کړي چې اروپايي ټولنه او نور هېوادونه د هغې لپاره افغانستان ته راغلي وو. نوموړی دغه راز وایي چې که امریکا دغه ډول اقداماتو ته ادامه ورکړي د اروپايي ټولنې له مخالفت سره به مخ شي. کای آیډه همدا راز وایي چې تر دې دمه په افغان سوله کې د ملګرو ملتونو رول دومره فعال نه دی، نو د یوې دایمي سولې او ثبات د رامنځ ته کېدو لپاره باید د افغانستان د سولې په مسئله کې ملګري ملتونه لا ډېر ښکېل شي او رول یې دې لا فعال شي. هغه تمه ښودلې چې امریکا وکړی شي له معقولو او روښانه لارو په افغانستان کې روانه جګړه ختمه کړي او سوله تامین کړي.