کرونا؛ ولې خلک یوازې له کوره بهر احتیاط کوي؟

یوې نوې څېړنې ثابته کړې چې کرونا وایروس په حقیقت کې له پخوانیو اټکلونو څخه په چټکۍ او لوړه کچه له ناروغ کس څخه نورو ته خپرېږي. د هغو ناروغانو چې د خپلې کورنۍ له غړي څخه پر دغه وایروس اخته شوي، ٪۷۵ يې د لومړي کس پر کرونا وایروس له اخته کېدو  ۵ ورځې وروسته پر دغه ناروغۍ اخته شوي دي. څېړونکي وايي چې کرونا وایروس په ډېرې چټکۍ سره د خپلوانو تر منځ خپرېږي، چې له همدې امله د خپلې کورنۍ نورو غړو د خوندیتوب لپاره هم باید ډېر احتیاط وشي. د څېړونکو په وینا، که په یوه کورنۍ کې څوک پر کرونا وایروس اخته شي، نو لږ تر لږه د خپلې کورنۍ ٪۵۰ نور غړي پر دغه وایروس اخته کوي او د وایروس د خپرېدو دغه عمل په ډېرې چټکۍ سره تر سره کېږي. د دې څېړنې څېړونکي وايي چې خلک اکثره له کور څخه بهر ماسک اغوندي او ټولنیز واټن ساتي، خو کور کې د ننه هېڅ ډول احتیاط نه کوي چې له همدې امله که چېرې د کورنۍ کوم غړی پر دغه وایروس اخته شي، یوازې څو ورځو کې د کورنۍ نور غړي هم پر دغه وایروس اخته کولی شي.