کونړ؛ د یوې ترافیکي پېښې له کبله ٨ تنه ټپیان شوي دي

د کونړ ولایت ځایي چارواکي وایي، چې په اسمار ولسوالۍ کې د یوې ترافیکي پېښې له کبله ۸ کسان ټپیان شوي دي. سرچينې ویلي، چې یاده پېښه په اسمار ولسوالۍ کې هغه مهال رامنځته شوه، چې یو ډاټسن ډوله موټر سیند ته ولوېد او په پایله کې یې د ښځو او ماشومانو په ګډون ٨ تنه ټپیان شول. سرچینې ویلي، چې د یادې پېښې ټپیان د اسمار ولسوالۍ روغتون ته لېږدول شوي.  ځایي مسوولینو د یادې پېښې اصلي لامل د موټرچلوونکو بې احتیاطي او د سړک خرابوالی ښودلی دی.