ګارډېن ورځپاڼه: بریټانیا له افغانستان سره په کړو ژمنو کې ناغیړي کوي

بريټانيا د روان کال له جنوري مياشتې راهيسې، چې له افغانستانه يې د خپلو پخوانيو همکارانو د ايستلو پلان اعلان کړی، تر دمه يو کس هم نه دی لېږدولی. ګارډېن ورځپاڼې نن په يوه راپور کې ويلي چې د بريټانيا د بهرنيو چارو په وزارت کې يوازې پنځه يا اته تنه د هغو افغانانو پر دوسيو کار کوي چې پخوا يې په افغانستان کې له بريټانيا سره همکاري کړې وه، په داسې حال کې چې د دغه وزارت ۵۴۰ کارکوونکي له اوکراين سره د مرستې پر پروګرامونو کار کوي. ګارډين وايي چې دغه شمېرې له افغان همکارانو سره د بريټانيا د بې پروايۍ او بې کفايتۍ څرګنده نښه ده. د يادونې وړ ده چې بريټانيا د روان کال په جنوري مياشت کې ۲۰ زرو افغانانو ته د پناه ورکولو ژمنه وکړه. بريټانيا ويلي وو چې خپله دغه ژمنه به په پنځو کلونو کې پوره کړي.