یوناما: د نجونو پر زده‌کړو بندیز، تېر پرمختګونه له منځه وړي

افغانستان کې د ملګروملتونو سازمان د استازولۍ دفتر یا یوناما ویلي، چې له زده‌کړو د نجونو منع کول د زده‌کړو په برخه کې د تېرو شلو کلونو اصلي پرمختګونه له منځه وړي. یوناما پرون د یوې خبرپاڼې په خپرولو سره یو ځل بیا له ا.ا غوښتي، چې د نجونو پر زده‌کړو لګول شوی بندیز لرې کړي. په هېواد کې له سیاسي بدلون څخه شاوخوا یونيم کال تېریږي، خو تر اوسه د نجونو پرمخ له شپږم ټولګي پورته ښوونځیو دروازې تړلې پاتې دي. په همدې حال کې د کابل ښار یو شمېر اوسېدونکي وایي، که حکومت له شپږم ټولګي پورته د نجونو زده‌کړو ته اجازه ورنه کړي نو ډېرې کورنۍ به کډوالۍ ته اړې شي؛ خو حکومت بيا وايي چې په دغه برخه کې پر يوه ميکانيزم کار روان دى.