یونیسف: غور کې د لمریزې برېښنا په مرسته د اوبو رسولو سیستمونه جوړېږي

د ملګرو ملتونو د ماشومانو د ملاتړ صندوق (یونیسف) وايي، د غور ولایت په زیانمنو سیمو کې د لمریزې برېښنا په مرسته د څښاک پاکو اوبو د برابرولو سیستمونه جوړوي. یونیسف ویلي، کورونو ته نږدې د پاکو اوبو برابرول ماشومانو ته زمینه برابروي چې د اوبو راوړلو پر ځای خپلې زده‌کړې، لوبو او ودې ته ډېر وخت ورکړي. د یاد سازمان په خبره، دا سیستمونه د کوریا د بهرنیو چارو وزارت په ملاتړ جوړېږي او د کورنیو د ژوند د شرایطو په ښه کېدو کې به مرسته وکړي. افغانستان کې، په ځانګړې توګه په لرې پرتو سیمو کې، پاکو اوبو ته لاسرسی لا هم له مهمو ننګونو څخه دی.