ټرمپ: که ایران غبرګون وښيي، له پراخو بریدونو سره به مخ شي

د امریکا ولسمشر ډونالډ ټرمپ خبرداری ورکړی چې که ایران د امریکا وروستیو بریدونو ته غبرګون وښيي، واشنګټن به پر دغه هېواد پراخ بریدونه وکړي. الجزیرې راپور ورکړی چې ټرمپ ویلي، د امریکا «لوی او ځواکمن» بریدونه هرمز تنګي ته څېرمه د ایران پر اهدافو دوام لري. د ټرمپ په وینا، دغه بریدونه د هرمز تنګي کې د ایران د ماینونو خښولو د هڅو او په اردن کې د امریکا پر یوې پوځي اډې د ایران د اتو توغندیو د برید په غبرګون کې شوي دي. نوموړي ادعا کړې چې ایراني توغندي شنډ شوي او په هرمز تنګي کې ځای پر ځای شوي ماینونه هم پاک یا له منځه وړل شوي دي. ټرمپ خبرداری ورکړی چې که ایران غبرګون وښيي، له «سختو او پراخو» بریدونو سره به مخ شي او د جګړې د دوام په صورت کې به امریکا داسې بریدونه وکړي چې د ایران اسلامي جمهوریت ته درانه زیانونه واړوي.