د امریکا ولسمشر جوبایډن روسیې ته خبرداری ورکړی، که ناوالني په زنداني حالت کې مړ شي، د روسیې او ټولې نړۍ ترمنځ اړیکو ته به سخت زیان ورسوي. کله چې په بروکسل کې د ناټو په مرکزي دفتر کې د خبري کنفرانس پر مهال د امریکا له ولسمشر جو بایډنه د روسیې د حکومت د سرسخته منتقد الکسي ناوالني د احتمالي مړینې په اړه پوښتنه وشوه، نوموړي یې په ځواب کې وویل: «که ناوالني مړ شي، دا به له روسیې سره د امریکا او ټولې نړۍ اړیکو ته زیان ورسوي».
بایډن په خپلو خبرو کې زیاته کړه، چې که ناوالني مړ شي، دا به نور هم وښيي چې روسیه اساسي بشري حقونو ته درناوی نه لري او دا به یوه لویه غمیزه وي. دا په داسې حال کې ده چې تېرکال پر الکسي ناوالني د زهرو حمله شوې وه او د ده ملاتړو ویلي چې پوتین د دې حملې امر کړی و.
نوموړي دغه راز د روان کال په اپرېل میاشت کې د ۲۴ ورځو لپاره د نه خوړلو اعتصاب پیل کړ، خو اندېښنې زیاتې شوې چې دی به له لوږې مړ شي؛ ځکه ناوالني یو ځل ویلي وو، چې دی داسې ښکاري لکه یوازې هډوکي چې ورپاتې وي.
نوموړي دغه راز د اپرېل په ۲۳مه خپل اعتصاب پای ته ورساوه او تېره اونۍ د زندان له روغتونه بېرته په بند کې خپلې خونې ته انتقال کړای شو. وړمه ورځ د خبري کنفرانس پرمهال د امریکا له ولسمشر جوبایډنه له پوتین سره د جنیوا د جون د ۱۶مې د سرمشریزې په اړه پوښتنه وشوه، خو بایډن يې په اړه مفصل ځواب ورنه کړ، خو نوموړي زیاته کړه چې له پوتین سره به د توافق برخې لټوي او په همدې حال کې به د امریکا او یاد هېواد د متحدینو پر وړاندې د روسیې د مخالفتونو په اړه خبرداری ورکړي.
بایډن زیاته کړه: «زه به ولسمشر پوتین ته روښانه کړم چې داسې موارد شته چې موږ پکې له یو بل سره همکاري کولای شو، که دی وغواړي او که ونه غواړي چې همکاري وکړي او د سایبري امنیت او نورو برخو په اړه داسې چلند وکړي، لکه پخوا چې یې کړی، موږ به هم ورته غبرګون ښيو.»
بایډن، پوتین یو هوښیار او وړ مخالف وباله، خو ويې ویل چې دی به د غونډې هر ډول پایله لومړی ارزوي بیا به ورباندې باور کوي. د هغه په خبره، د ناټو هېوادونو مشرانو هم ترې مننه کړې چې له پوتین سره یې غونډه تنظیم کړه.