ممنون مقصودي د افغانستان د مشهور استاد شاه مقصود گرم زوی دی، چې په خپل وخت کې د ښه نوم او شخصیت استاد و. مقصودي له آره د ننگرهار ولایت د کوټ ولسوالۍ اوسېدونکی دی، چې اوس په کابل ښار کې د قصبې په نوم سیمه کې ژوند کوي.
مقصودي لومړنۍ زده کړې په کابل کې د عمران په ښوونځي کې پيل کړې او تر اتم ټولګي یې په همدې ښوونځي کې زده کړو ته دوام ورکړ. بیا یې له اتم ټولگي تر دوولسم هغه پورې په ابن سینا ښوونځي کې زده کړو ته دوام ورکړ او وروسته بیا د وخت جبري پوځي دندې ته ونیول شو او عسکري دنده یې درې کاله او شپږ میاشتې تر سره کړه. له عسکرۍ وروسته بیا د کابل پوهنتون ښکلو هنرونو پوهنځي ته د کانکور ازموینې له لارې بریالی شو. د پوهنځي وروستی کال یې و چې په کابل کې سیاسي وضعیت خراب شو او دی هم لکه د نورو افغانانو په څېر کډې کولو ته اړ شو. ښاغلي ممنون مقصودي يوولس کاله د کډوالۍ ترخې، لوړې او ژورې په پاکستان کې ولیدې او په خبره یې هغه وخت په خپل وطن پسې ډېر ځورېده. مقصودي د کډوالۍ پر مهال په ۱۹۹۴ کال د بيبيسي په تعليمي خپرونه (نوی کور او نوی ژوند) کې کار پیل کړ.
ښاغلی ممنون مقصودي د افغانستان د گوتو په شمار له څو تکړه ممثلانو، هنرمندانو او ډرامه جوړونکو څخه شمېرل کېږي. ښاغلي مقصودي د راډيويي ډرامو، راډيويي داستانونو، فلمونو او د نندارې په بهیر کې د تمثیلي پارچو او هر اړخیزو سټېج ډرامو په جوړولو کې کار کړی دی او له بيبيسي راډيو سره یې په تعلیمي خپرونو کې د فعال ممثل، سناریسټ او راډيو ډرامو ډايرکټر په توگه دنده تر سره کړې ده.
مقصودي وايي چې له تمثیل او ډرامې سره یې له ډېر ماشومتوبه مینه درلوده او په خبره یې کله چې په اووم او اتم ټولگي کې و، احساس یې کړه چې مشره خور صایمه مقصودي چې په راډيو ډرامو کې یې کار کاوه او مشر ورور داوود مقصودي چې هغه هم په راډیو ډرامو کې مصروف و او له هغوی به یې د خپلو استادانو توصیف اورېده، د ده په زړه کې هم دا راوګرځېده چې راشه په دې برخه کې خپل استعداد وازمویه. وروسته بیا هماغه وو چې په دې برخه کې یې لومړني ګامونه ډېر وستایل شول او ده نور دې برخه کې کار کولو ته مخه کړه.
مقصودي وايي لومړي تمثیلي کارونه یې د ښوونځي په دوران کې د ملي ورځو د نمانځلو او د ښوونکي ورځې په وياړ د پروگرامونو په لړ کې پیل کړل او بیا قدم په قدم آن د افغانستان تر ملي راډيو- ټلوېزیون او ملي نندارې پورې ورسېد. د ښاغلي ممنون مقصودي په خبره، د تمثیل لومړنۍ زده کړې یې له استاد ښاغلي فضلي چې په ف- فضلي مشهور و او له استاد رفیق صادق څخه کړې ده چې له هر یوه یې په دې برخه کې ډېر څه زده کړي دي.
ښاغلي مقصودي که څه هم چې په لسګونو تياتر نندارو، راډيويي ډرامو، تمثیلي پارچو او لسګونو فلمونو کې کار کړی دی، خو تر ټولو ډېر شهرت یې د «د کونډې زوی» سریال کې تر لاسه کړی او د خلکو منځ کې د شادگل په نوم مشهوره دی، چې تر اوسه یې دغه هنري کرکټر د خلکو تر منځ بې جوړې بريالی يادېږي .
لسیزې وړاندې ممنون مقصودي د کونډې زوی سریال کې د شادګل مشهور رول ولوباوه، چې تر اوسه یې هم خلک له لیدو خوند اخلي. هغه اوس هم د افغانستان د سینما له محبوبو څېرو څخه دی.
خلک د ممنون مقصودي په اړه بېلابېل نظرونه لري او وايي ممنون مقصودي په سختو حالاتو کې د افغاني ټولنې رښتینی انځور د تمثیل په ژبه وړاندې کړی او د تیاتر په برخه کې یې هڅې نه ستړې کېدونکې دي.
دوی دغه راز نیوکه کوي چې که چېرته هغه ته د فلمونو او سريالونو جوړولو په برخه کې زمينه برابره شوې وای، نو زموږ د سينما برخه به نن داسې تش لاس نه واى او پرديو سريالونو او فلمونو به زموږ د فرهنګ جرړې نه ايستلې.
ممنون مقصودي وايي چې د کونډې زوی سریال یوازې درې برخې ثبت شوې او نورو برخو ته پرېنښودل شو. دی ګیله من دی او وايي که چیرته پرېښودل شوی وای، اوس به یې ډېر کار کړی وای او لږ تر لږه د پردیو سریالونو مخه به یې نیولې وه. مقصودي زیاتوي چې حتی د دې سریال راتلونکو برخو ته د هیواد ځینو لیکوالانو د کیسو کار هم پیل کړی و، خو مادي ستونزې او په هیواد کې روان وضعیت د دې سبب شول چې تر اوسه لا هم د دې سریال پاتې برخې ثبت نشي.
د اطلاعاتو او کلتور وزارت هم مني چې د تیاتر په برخه کې تر اوسه ممثلینو ته هغسي کار نه دی شوی لکه څنګه چې پکار وه. د دغه وزارت کلتوري او هنري معین هارون حکیمي وايي چې دوی پلان لري نږدې راتلونکي کې د ممنون مقصودي په څېر نورو شخصیتونو ته په بېلو برخو کې د کار زمینه برابره کړي. د نوموړي په خبره، د دې وزارت رهبري ژمنه ده چې د تیاتر په برخه کې خپلې هڅې ګړندۍ کړي او له ممثلینو سره په بېلو برخو کې مرستې وکړي.
ښاغلی مقصودي دوه زامن او يوه لور لري. د ممنون مقصودي مېرمن لينا مقصودي نومېږي او هغه هم د نوي کور نوي ژوند په راډيويي ډرامو کې د عاطفې په نوم د یو کرکټر رول لوبوي.
مقصودي له سپوږمۍ راډيو سره په یوه ځانګړې مرکه کې ویلي، چې لا یې هم د ټولنې پر وړاندې خپل حق نه دی ادا کړی او ډېر کار ته اړتیا ده چې باید تر سره یې کړي، خو په هیواد کې روان وضعیت یې د کارونو پر وړاندې خنډ جوړ کړی او دا حالت یې ډېر ځوروي.
ممنون مقصودي هغه وخت لا شهرت وموند چې (د کونډې زوى) په سریال کې یې د شادګل کردار ولوباوه. دغه سریال نه يوازې دا چې په خپل وخت کې يو ډېر مشهور سریال و، بلکې دا سریال تر لسيزو پورې خلکو په کورونو کې ډېر په مينه کتلو او اوس هم ډېر مینه وال لري.
ښاغلی ممنون مقصودي د کډوالۍ په وخت په وروستيو کې په يو هنري فلم کې هم راڅرگند شو. دا فلم «نیلوفر در باران» نومېده او د فلم ډایرکټر ېې همايون کریمپور دی، چې په فرانسه کې مېشت دی. نوموړی هنري فلم په فرانسوي او فارسي ژبه جوړ شوی او د همايون کریمپور په نوښت د نړۍ په اتو غټو فيسټيوالونو کې ښودل شوی دی، چې ځینې جایزې یې هم اخیستې دي.
د نورو افغانانو په څېر مقصودي هم د وطن جنګ جګړو ګډوالۍ ته اړ کړ دی او وایي، هغه شېبې یې په ژوند کې تر ټولو سختې وې چې کله له وطن څخه کډوالۍ ته اړ شو او هر څه یې پرېښودل. نوموړي په کډوالۍ کې ډېرې سختې تېرې کړې او د وطن په حالاتو به یې زړه ټوک ټوک کیده. نوموړی وایي دا چې اوسمهال په خپل وطن کې له خپلو بچو او هیوادوالو سره اوسي، خوښ او له خپل ژوند څخه راضي دی.
ممنون مقصودي تر اوسه پورې له لسو په زياتو هنري فلمونو کې راڅرگند شوی دی او تر ټولو مشهور فلمونه یې دا دي: عزت، تنکی حج، زهر، ولسمشر ته لیک، اې توپیا، خاک و مرجان، پښېماني، زهر، پرانيستې غېږ، د کونډې زوی، خط سوم، نيلوفر در باران، ارمان او د دې تر څنګ یې ملې راډيو ته په زرګونو داستانونه او ډرامې جوړې کړې دي.
ممنون مقصودي اوسمهال په کابل پوهنتون کې له تېرو ۱۳ کلونو راهیسې پرته له کوم امتیاز محصلینو ته د هنر او تمثیل په برخه کې زده کړې ورکوي.
ښاغلی مقصودي وايي، تر ټولو لویه هیله یې دا ده چې د هیواد هغه دښمنان د تمثیل په ژبه خلکو ته ور وپېژني، چې د دې وطن بچیان یې یتیمان کړي او دا وطن یې لوټې لوټې کړی دی.
ښاغلی مقصودي اوسمهال ۵۶ کاله عمر لري او په کابل ښار کې ژوند کوي.