د زرنج او شبرغان ښارونو له نیولو وروسته، طالبانو له تېرې شپې راهیسې د سرپل، تخار او کندز پر ښارونو پراخ ډله ییز بریدونه پیل کړي او دا ډله ادعا کوي چې د دری واړو ولایتونو مرکزونه یې تر خپلې ولکې لاندې راوستي دي. په ورته مهال افغان حکومت مني چې طالبان دغو ښارونو ته دننه شوي، خو په خبره یې، یادو ښارونو سقوط نه دی کړی او طالبان هلته د مېشتو امنیتي ځواکونو له سخت مقاومت سره مخ شوي دي.
د افغانستان د وسلهوالو ځواکونو ویاند اجمل عمر شینواری وايي: «طالبانو له تېرې شپې راهیسې پر سرپل، تخار، کندز بریدونه پیل کړل او اوس په دې ښارونو درنه جګړه روانه ده.»
خو د طالبانو د ډلې ویاند ذبیحالله مجاهد بیا پر خپله ټویټرپاڼه لیکلي: « د سرپل، کندز او تخار ولایتونه مرکزونه یې نیولي او په دغو ښارونو کې یې د وسلهوالو پرمختګ روان دی.»
خو د ملي دفاع وزارت دا خبره نه مني او په یوه خپره کړې خبرپاڼه کې يې ویلي: «په کندز کې کمانډو ځواکونو د شهید عبدالرازق څلورلارې او د ملي راډیو ټلوېزیون ودانۍ له طالبانو بېرته نیولې او د ښار په نورو څنډو کې یې عملیات روان دي.»
په ورته مهال په ټولنیزو رسنیو کې هم په دغو ښارونو کې د جګړو یو شمېر بوږنوونکې ويډیوګانې خپرې شوې دي. په دغو ويډیوګانو کې ښکاري چې وسله وال طالبان د ښارونو په منځ کې له امنیتي ځواکونو سره جګړه کوي او دغه راز په کندز ښار دننه په یو شمېر هټیو کې اور لګېدلی او په نورو ښارونو کې هم د ملکي وګړو د مرګ ژوبلې زړه بوږنوونکې ویډیوګانې خپرې شوې دي. په وېډیوګانو کې د خلکو له قوله چې دا اور او ملکي مرګ ژوبله د افغان ځواکونو او طالبانو ترمنځ د جګړې په پایله کې رامنځته شوې او ترڅنګ یې خلکو ته درانه مالي زیانونه هم اوښتي دي.
که څه هم تر اوسه په دغو ښارونو کې د روانې جګړې د مرګژوبلې په اړه دقیقې شمېرې نهشته، خو ملي دفاع وزارت وايي، په دغو جګړو کې یې طالبانو ته درنه مرګ ژوبله اړولې ده.
پر کندز، سرپل او تخار سربېره، وسله والو طالبانو پر کاپیسا، پنجشېر او بدخشان هم ډیله بریدونه کړي، خو حکومتي چارواکي وايي چې دا بریدونه یې په شا تمبولي او طالبانو ته یې درنه مرګژوبله اړولې ده.
بلخوا د طالبانو دغو بریدونو پراخ غبرګونونه هم راپارولي دي. په کابل کې د امریکا سفارت په یوه خبرپاڼه کې لیکلي، چې د افغانستان پر ښارونو د طالبانو بریدونه غندي.
په اعلامیه کې راغلي، د نیمروز په زرنج، د جوزجان په شبرغان او لښکرګاه د طالبانو بریدونه چې په زور ځانونه حاکمول غواړي، د منلو نه دي او دا کار د هغې ادعا سره ټکر کې دی چې طالبان وايي، د خبرو له لارې شخړه حلوي.
له دې سره جوخت، د مشرانو جرګې لومړي مرستیال محمد علم ایزیدیار په هېواد کې د طالبانو له لوري روانو پراخو جګړو ته په اشارې ویلي، چې د واشنګټن له لوري په یوه وخت د حکومت او طالبانو په رسمیت پېژندنه د هېواد د اوسني کړکېچ لامل دی. نوموړي په کابل کې له افغان امنیتي او دفاعي ځواکونو څخه د ملاتړ مراسمو ته په وینا، کې ویلي چې د واشنګټن له لوري له افغان حکومت سره د امنیتي تړون سربېره، دغه هېواد له طالبانو سره هم د سولې تړون وکړ او دغه ډله یې په رسمیت وپېژندله. نوموړي د خپلو خبرو پر دوام زیاته کړې چې د امریکا- طالبانو تړون د اوسني کړکېچ پیل و. ایزیدیار ټینګار کړی چې که طالبان په زور واک ته ورسېږي، هم نو معنا یې ټیکاو نه، بلکې د دغې ډلې پر وړاندې به مقاومت دوام پیدا کوي.