د چين د اکمالاتي ځنځير درېيم نړیوال نندارتون د جولای په شلمه نېټه په پلازمېنې بېجينګ کې پای ته ورسېد.
د امريکا د اېپل شرکت د عمومي مدير مرستیال او په چين کې د دې شرکت فرعي څانګې عمومي مدير ګه يو سي اېم جي ته ويلي، چې شرکت یې نه يوازې د پانګونو او مستعدو کسانو په برخه کې له چينايي اکمالاتي شرکتونو سره همکارۍ لري، بلکې په نورو ډېرو برخو کې هم ورسره د همکاريو په لټه دي.
نوموړي ويلي، چين د اېپل شرکت د ځنځير يوه کړۍ ده او پرېکون يې ناشونې چاره ده.
د ډېرو نړيوالو تصديو استازو په دې وروستيو کې ورته نظرونه څرګند کړي او ويلي يې دي چې هغوی په دغه نندارتون کې ډېر غوره اکمالاتي شرکتونه پیدا کولی شي.
دوی د چين اکمالاتي ځنځيرونه بشپړ او لوی بولي او په خبره یې، دغو ځنځيرونو د شرکتونو او تصديو د توليدي ثبات لپاره ضمانت برابر کړی دی.
ياد نندارتون د نړۍ د صنعتي او اکمالاتي ځنځيرونو د ثبات لپاره ۱۲۰۰ تصدۍ راجلب کړي، چې په دې جملې کې د امريکايي ګډونوالو تصديو شمېر د تېرې دورې په پرتله په سلو کې ۱۵ زیات و، چې دا د نورو بهرنيو ګډونوالو تصديو په پرتله زياتوالی ښيي.
امريکايي تصديو په دغه نندارتون کې له ګڼو شرکتونو سره څه باندې شپږ زره همکاريز تړونونه لاسليک کړي دي.
د چين د اکمالاتي ځنځيرونو نړيوال نندارتون تشکيلاتي کمېټې پر لومړي ځل د ګډونوالو شرکتونو اتحاد او د نوښتي ځنځير ځانګړې سيمه جوړه کړې او د نويو توليداتو د لومړيو صادراتو لپاره يې اړوند فعاليتونه ترسره کړي دي.
ځنځير په دغه نندارتون کې د پاملرنې وړ ټکی ګرځېدلی دی، چې دلته به یې يوې بېلګې ته اشاره ولرو.
د امريکا اېپل شرکت له درېیو چينايي همکارانو سره خپل توليدات نندارې ته وړاندې کړي، چې دا د چين د اکمالاتي ځنځيرونو د جذابيت ښه ښکارندويي کوي.
په دغه نندارتون کې د ګډونوالو تصديو شوق او زوق او لاسته راوړنې د دې څرګندويي کوي، چې نړۍ د اکمالاتي ځنځيرونو ثبات ته بېړنۍ اړتيا لري.
امريکا په داسې حال کې د ګڼو هېوادونو پر وړاندې سوداګريزه جګړه پيل کړې، چې په نړۍ کې جيوپوليټيک وضعيت ورځ تر بلې په ترينګلېدو او ځاني سوداګرۍ ساتونکې کړنې پکې مخ په زياتېدو دي او دغې کړنې يې نړيوالو اکمالاتي ځنځیرونو ته سخت زیانونه رسولي دي.
دغه نندارتون د نړۍ د اکمالاتي ځنځيرونو د پرمخبېولو په هکله يو راپور خپور کړی او اړوند ګرافونه يې ښيي چې د نړۍ اکمالاتي ځنځيرونه نسبتأ کمزوري روان دي.
په راپور کې له بېلا بېلو شرکتونو غوښتنه شوې، چې د روښانه راتلونکې لپاره يو او بل ته لاسونه ورکړي او د ستونزو پر وړاندې ګډه مبارزه وکړي.
د چین اکمالاتي ځنځیرونو د ډيجیټلي پرمختګ په مټ ډېر زیات غوره والی ښودلی دی.
د ډېرو بهرنيو تصديو مشرانو په خپلو خبرو کې څو څو ځلې هغو فابريکو ته اشارې کړي، چې روبوټونه پکې ۲۴ ساعته کارونه کوي.
په نړۍ کې د ۲۰۲۵م کال تر جنورۍ پورې د ورته فابريکو شمېر ۱۸۹ ته رسېدلی، چې په دې جملې کې يې ۷۹ فابريکې په چين کې موقيعت لري او دغه شمېر نړيوال مقام خپل کړی دی.
په شمالي اسيا کې د هالنډ د لويس دریفوس شرکت مرستيال عمومي مدير سون يونګ هوا رسنيو ته ويلي، چې شرکت یې نه يوازې د چین موثريت، بلکې مهربانه رویه هم احساس کړې ده.
دغه شرکت د چين د چنګ داو ښار ادارې سره د خواړو د ساينسي او تخنيکي مرکز د جوړولو تړون لاسليک کړ او په درېيو میاشتو کې يې ځمکه ترلاسه کړه او د روان کال په جون کې يې د ياد مرکز د جوړولو چارې پيل کړې.
ځايي حکومت د دې پروسې د اسانېدو او خدماتي ضمانت د برابرولو لپاره ډېرې هڅې کړې دي.
بهرنۍ تصدۍ چين کې پر پرمختګ باور ښودلی.
حقيقتونه دا په ګوته کوي، که د نړۍ اکمالاتي ځنځيرونه ګډې همکارۍ وکړي، نو اکمالاتي ځنځيرونه به يې انعطاف پذيري ښکاره کړي.
چين د نړۍ د مالونو د سوداګرۍ او د توليدي چارو د لومړي لوی هېواد په توګه د بنسټيزو تاسيساتو د پيوستون د لا پياوړتيا او د ورخلاصون د پرمخبېولو لپاره ډېرې هڅې کړي او د نړۍ د اکمالاتي ځنځيرونو د ثبات لپاره يې ثابت عوامل برابر کړي دي.