بدخشان؛ د ۱۰ کیلومتره په اوږدوالي د کانال جوړېدو چارې بشپړې شوې

د بدخشان ځایي چارواکي وایي، چې د دغه ولایت په بهارک ولسوالۍ کې د ۱۱ میلیونه افغانیو په لګښت د ۱۰ کیلومتره په اوږدوالي د یوه کانال د جوړېدو چارې بشپړې او ګټې اخیستنې ته سپارل شوی دی.
د یادې ولسوالۍ ولسوال مولوي عبدالتواب رسنیو ته ویلي، چې په دشت فراخ سیمه کې د ځایي خلکو په مالي ملاتړ د یوه کانال د جوړېدو چارې بشپړې او ګټې اخیستنې ته سپارل شوی دی. د نوموړي په خبره د یاد کانال پر مټ به ۸۰ زره جریبه کرنیزه ځمکه خړوبه او په مستقیمه توګه به ترې ۱۰ زره کورنۍ هم ګټه پورته کړي. د یادونې وړ ده، چې د یاد کانال د جوړېدو چارې ۳ میاشتې مخکي پیل شوې وې، چې د کار په بهیر کې یې د سیمې لسګونه کسانو ته د کار زمینه هم برابره شوې وه.