لیکنه: امنه عزیزي
ننګرهار کې په دې وختونو کې د ښځو لپاره د ځانګړو خوندي رسټورانټونو پېرودونکو شمېر څو برابره زیات شوی، ګڼ مېشتی جلال آباد ښار چې په کې د تفرېح لپاره کم ځایونه
او فرصتونه پیدا کیږي، په ځانګړې توګه د ښځو لپاره د تفرېح ټاکلي ځایونه ډېر کم تر سترګو کیږي. خو په په وروستي یو کال کې د ښځینوو د تفرېح او کورنیو راټولېدو لپاره د بېلابېلو لویو مغازو په پورتنیو برخو کې خوندي رسټورانټونه جوړ شوي دي.
ډله ډله نجونې د ژوند له ستړو او ناخوالو د لېرې کېدو لپاره دلته راځي او په خپلو منځونو کې د زړه خوالې مجلسونه په خوندورو خوړو ګرموي.
مدینه عزیزي چې وخت ناوخت له خپلو ملګرو سره رسټورانټ ته راځي وایي، دلته له ملګرو سره لیده کاته کوي او د مجلس او تفرېح لپاره دا ځایونه ورته خوندي دي.
آغلې عزیزي زیاتوي:«دلته راتګ راته یو څه راحته دی، هر کله مې هم چې زړه تنګ شيله ملګرو سره رسټورانټ ته راځم، هم خپلمنځي کیسې او مجلس کوو چې دا زموږ د ذهن له تازه کېدو سره ډېره مرسته کوي او هم خوندور خواړه خورو.»
دا رسټورانټونه چې د ښځینه پېرودونکو په وینا په ښکلې او زړه راښکوونکې بڼه جوړ شوي، د کورنیو راټولېدو لپاره یې هم ښه فرصت برابر کړی.
په لومړیو کې دغو رسټورانټونو ته د کورنیو راتګ له یو څه محدودیتونو سره مخ و خو اوس د یو کور ښځینه، نارینه او ماشومان کولی شي ورته تګ راتګ وکړي او په خپلمنځونو کې نه هېرېدونکې شېبې جوړې کړي.
فوزیه سیدي چې له خپلې کورنۍ سره یو له دغورسټورانټونو ته راځي وایي، په لومړیو کې یې یوازې ښځې پریښودلې، د ناستې ځایونه یې یو څه کوچني وو خو اوس یې پراخه کړي او له هرې کورنۍ سره محرم نارینه هم پریږدي.
مېرمن سیدي له کورنۍ سره د راتګ او د تفرېح د ګټو په اړه غږیږي: «ډېر خوشحالیږو کله چې له کورنۍ سره دلته راځو، په خپلو کې ښکلي انځورونه اخلو، د خپلو ورونو، سره مېړه سره او د خاطراتو په ډول یې ساتو. واقعاً دغسې ځایونو ته تلل او تفرېح کول زموږ په ذهنونو او فکرونو مثبت اغیز کوي، زموږ ستړیا له منځه وړي او همدارنګه د کورنۍ د غړو ترمنځ د میني د زیاتوالي لامل کیږی ځکه د خپلې کورنۍ غړو ته وخت ورکول تر ټولو مهمه خبره ده، نارینه تل په خپلو دندو کی بوخت وي او داسې ځایونو ته په تګ سره د خپلو کورنیو تر څنګ ښه وخت تیروي.»
د ښځینو لپاره دغه رسټورانټونه نه یوازې د ورځې له خوا خوندي او له ګڼې ګوڼې ډک وي بلکې د شپې له خوا هم ډېرې کورنۍ د تفرېح او خوندورو خوراکونو د خوړلو لپاره راځي.
لیلا صافۍ چې ډېر کله د شپې له خوا رسټورانټ ته راځي وایي: «هر کله چې کور کې د ستړیا احساس وکړو یا مو د کور خواړه په طبیعت نه وي او یا مې کاکا لورګانې زموږ کور ته راشي نو بیا د شپې له خوا رسټورانټ ته د تګ نیت کوو او واقعاً ډېر په امن کې دي او آرامه ځایونه دي.»
د ښځینوو د یوه ځانګړي رسټورانټ مدیر مسوول روحالله آمین د داسې یو ځای د جوړېدو انګېزې او د ښځینه پېرودونکو په اړه وایي، زموږ اساسي موخه دا وه چې ښځې او کورنۍ وکولی شي په یو ارام، باعزته او خوندي چاپېریال کې له بېلابېلو خوړو خوند واخلي. موږ د ټولنې کلتوري ارزښتونو، حیا او کورني آرام ته ځانګړې پاملرنه کړې، زموږ هڅه دا ده چې د ټولنې کلتوري ارزښتونو ته په درناوي، داسې چاپېریال رامنځته کړو چې هره کورنۍ او هره مېرمن په کې له بشپړ اطمینان سره ګډون وکولی شي.
ښاغلی آمین د محدودیتونو په اړه په ټینګار سره وایي: «له پیل څخه مو هڅه کړې چې غیرضروري محدودیتونه موجود نه وي. کورنۍ کولی شي په ازاد ډول زموږ له خدماتو استفاده وکړي. یوازینی اصل چې مراعتېږي، د نظم، احترام او د نورو مشتریانو د آرام ساتل دي.»
روح الله آمین د پخوا په پرتله د ښځینه پېرودونکو د شمېر د ډېروالي خبره کوي او زیاتوي، د ښځینه پېرودونکو شمېر د پام وړ زیات شوی. دا زیاتوالی د دې ښکارندويي کوي چې زموږ خدمات د ښځو د اړتیاوو او توقعاتو سره سمون لري.
دې ته ورته د یو بل رسټورانټ مدیر مسوول نورالحق زړګی هم د ښځو لپاره د تفرېح خوندي ځای د برابرولو په اړه وایي، زموږ اصلي انګېزه دا وه چې ښځې او کورنۍ وکولی شي په ارام، خوندي او د حیا له اصولو سره سم چاپېریال کې له خوراک او تفریح خوند واخلي. په ټولنه کې دا اړتیا ډېره محسوسېدله، ځکه ډېری ښځې او کورنۍ د مناسب محرمیت او امنیت د نشتوالي له امله عامو رسټورانټونو ته نه تلې. موږ غوښتل داسې ځای رامنځته کړو چې ښځې په کې ځان باوري، ازادې او هوسا احساس کړي.
ښاغلی زړګی د رسټورانټ د جوړولو په لومړیو کې د مسلکي ښځینه کارکوونکو نشتوالی د ستونزې په توګه یادوي او وایي، په پیل کې له بېلابېلو ستونزو سره مخ شو، لکه د مناسب ځای موندل، د لګښتونو لوړوالی، د مسلکي ښځینه کارکوونکو پیدا کول، او د خلکو د باور ترلاسه کول. ځینو کسانو دا نظر نوی باله او شکمن وو، خو د وخت په تېرېدو سره، د خدماتو او مناسب چاپېریال له لارې دا ستونزې تر ډېره حل کړې.
نورالحق زړګی د دوی رېسټورانټ ته د کورنیو پر راتګ د محدودیتونو د نشتوالي خبره کوي او زیاتوي: «له پیل زموږ هڅه دا وه چې د کورنیو لپاره اسانتیاوې برابرې کړو. کوم ځانګړی غیر ضروري محدودیت نشته، یوازې د نظم، پاکوالي او د نورو مراجعینو د آرام لپاره ځینې اصول مراعاتېږي. اوس هم کورنۍ کولای شي په بشپړ ډاډ او ارامتیا سره زموږ رسټورانټ ته راشي.»
په دغو رسټورانټونو کې ښځینه خدمتګارانې او پخلي کوونکي تراوسه نشته او ټولې چارې یې د نارینه کارکوونکو له لوري سمبالیږي.
خو بل لور د دغو رسټورانټونو یو شمېر پېرودونکې د خوړو له بیو شکایت کوي وایي، مناسبې نه دي او ډېرې نجونې یې نه شي پرې کولی. په ځواب کې یې د رسټورانټونو مدیر مسؤولان وایي، موږ د بیو په ټاکلو کې تل د کیفیت او د خلکو د اقتصادي وضعیت ترمنځ توازن په پام کې نیسو. زموږ هڅه دا ده چې معیاري، پاک او خوندور خوراک وړاندې کړو، خو په داسې بیه چې د ډېرو کورنیو لپاره د منلو وړ وي. سره له دې، د بازار د بیو او د موادو د لګښت له امله کله ناکله بیې لوړېږي، خو موږ هڅه کوو دا زیاتوالی تر ممکن حده محدود وساتو او د مشتریانو شکایتونو ته جدي پاملرنه وکړو.
د یادونې وړ ده چې په ننګرهار کې د مېرمنو د تفرېح او راټولېدو لپاره د دا ډول ټاکلو او خوندي ځایونو د جوړېدا هڅې نوې پیل شوي دي.