د ۲۰۲۶م میلادي کال د جنورۍ شلمه نېټه د افغانستان او د چین ولسي جمهوریت ترمنځ د رسمي دیپلوماتیکو اړیکو د ټینګېدو له تاریخي پيل څخه د ۷۱مې کلیزې نښه ده. دا ورځ یوازې د څو لسیزو دیپلوماتیکو اړیکو یاد نه دی، بلکې د دوو لرغونو ملتونو ترمنځ د هغې دوستۍ، باور او متقابل درناوي سمبول دی چې ریښې یې د تاریخ په ژورو کې، تر زرګونو کلونو پورې غځېدلې دي.
افغانستان او چین د اسیا په زړه کې دوه داسې تمدنونه دي چې د تاریخ په اوږدو کې یې د سوداګرۍ، فرهنګ او انساني اړیکو په پراختیا کې مهم رول لوبولی دی. د لرغوني تاریخ له پاڼو ښکاري چې د دواړو ولسونو ترمنځ اړیکې یوازې د سیاست تر کچې محدودې نه وې، بلکې د خلکو ترمنځ تګ راتګ، فکري تبادله او اقتصادي همکاري یې اصلي بنسټ جوړاوه. د د ورېښمو لاره د همدې اړیکو یو ژوندی مثال و، چې افغانستان یې د ختیځ او لوېدیځ ترمنځ په یوه مهم تمدني او سوداګریز پل بدل کړی و او چین یې له مرکزي او جنوبي اسیا سره نښلاوه.
د تاریخ په بېلابېلو پړاوونو کې، د افغانستان او چین اړیکې د بدلونونو سره سره تل پر دوام ولاړې پاتې شوې. بیلا بېلو سیاسي بدلونونو د دې اړیکو پر ژورتیا منفي اغېز نه دی کړی، بلکې د متقابل زغم او احترام له لارې یې لا پراخوالی موندلی دی. دا هغه ځانګړنه ده چې د دواړو ملتونو اړیکې له ډېرو نورو نړیوالو اړیکو څخه بېلې او ځانګړې کوي.
په معاصر تاریخ کې، د شلمې پېړۍ له نیمایي وروسته، د افغانستان او چین ترمنځ رسمي دیپلوماتیکې اړیکې پر داسې اصولو ولاړې شوې چې د ښه ګاونډیتوب، د ملي حاکمیت درناوي او د نهمداخلې سیاست پکې بنسټیز ځای لري. چین د افغانستان د یو ګاونډي هېواد په توګه تل هڅه کړې چې اړیکې یې له کابل سره له شخړو او فشارونو پاکې وي، او افغانستان هم چین د یو باوري شریک او د سیمې د ثبات د ملاتړي په توګه پېژندلی دی.
په وروستیو کلونو کې، سره له دې چې افغانستان له سختو سیاسي، اقتصادي او نړیوالو ننګونو سره مخ و، د افغانستان او چین اړیکې پر خپل مثبت مسیر روانې پاتې شوې دي. چین د سیاسي تعامل، اقتصادي همکاریو او بشري ملاتړ له لارې دا پیغام ورکړی چې د افغانستان له خلکو سره د دوستۍ اړیکه د شرایطو تابع نه ده، بلکې د اوږدمهاله لید، تاریخي باور او ګډو ګټو پر بنسټ ولاړه ده.
نن، چې نړۍ د سیاسي بدلونونو، اقتصادي سیالیو او امنیتي ننګونو په یوه نوې مرحله کې ده، د افغانستان او چین اړیکې د سیمې لپاره د ثبات، اتصال او متوازن پرمختګ یوه مهمه بېلګه بلل کېدای شي. دا اړیکې ښيي چې که دوستي پر تاریخ، اعتماد او متقابل احترام ولاړه وي، نو نه یوازې د وخت ازموینه تېروي، بلکې د راتلونکو نسلونو لپاره هم د همکارۍ او سولې یوه روښانه لاره پرانیزي. د افغانستان او چین ترمنځ دا اوږدمهاله دوستي کولی شي د پامیر له غرونو تر هندوکش او له هغه ځایه تر ستر دیوال پورې، د باور، پرمختګ او ګډ برخلیک پیغام ژوندی وساتي.