د پنجشېر سیمهییز چارواکي وايي چې په دې ولایت کې د کانونو د استخراج له امله عواید په څرګند ډول زیات شوي او دا بهیر د سیمهییز اقتصاد د ودې او د اوسېدونکو د ځانبسیاینې سره مرسته کوي. د هغوی په وینا، د کانونو د استخراج سیمې نږدې ۶۰۰ ساحو ته رسېدلې دي او تر اوسه پورې د ۱۷ ډولونو کانونه او قیمتي او نیمهقیمتي ډبرې، لکه زمرد، سره زر او بېروج، په دې ولایت کې پېژندل شوي دي. همدارنګه شاوخوا ۱۵ زره کسان د کانونو په برخه او اړوندو فعالیتونو کې بوخت دي. سیمهییز چارواکي زیاتوي چې د ۱۴۰۵ هجري لمریز مالي کال له پیل راهیسې تر اوسه ۱۹ زره ۸۴۶ قیراطه زمرد، چې ارزښت یې ۲ میلیونه ۴۲۶ زره ۲۸۳ افغانۍ کېږي، د پنجشېر له کانونو استخراج او پلورل شوي دي.
