بلخ کې د ۳۰ میلیونه ډالرو په پانګونه د نفتو چاڼخونه فعاله شوه

د بلخ ځایي چارواکي وایي، چې په دغه ولایت کې د ۳۰ میلیونه ډالرو په پانګونه د نفتو یوه چاڼخونه جوړه او فعالیت یې پیل کړی، چې په ۲۴ ساعتونو کې د ۶۰۰ ټنه سوند توکو د تصفیې ظرفیت لري. د چاڼخونې مسوولینو ویلي، چې په دې تصفیه‌خونه کې د زمردسای، انګوت او قشقرې له کانونو ترلاسه کېدونکي خام نفت پروسس کېږي او له تصفیې وروسته په ډیزلو، پټرولو او مازوتو بدلېږي.د فابریکې تخنیکي انجنیران وایي، دغه چاڼخونه د هېواد له طبیعي سرچینو څخه د اغېزمنې ګټې اخیستنې او د هېوادوالو د اړتیاوو د پوره کولو په موخه جوړه شوې ده. د دوی په وینا، اوس مهال په دې چاڼخونه کې له ۱۰۰ ډېر کسان پر کار بوخت دي.