یونیسف: خوارځواکو ماشومانو ته ژوند ژغورونکي روغتیايي خدمات وړاندې کوو

د ملګرو ملتونو د ماشومانو د ملاتړ صندوق یونیسف ویلي، په افغانستان کې پر شدیدې خوارځواکۍ اخته ماشومانو ته ژوند ژغورونکي روغتیايي خدمات وړاندې کوي. یونیسف پر خپله اېکس پاڼه لیکلي چې د اروپايي ټولنې په ملاتړ، خوارځواکو ماشومانو ته روغتیايي پروګرامونه وړاندې کېږي او د شدیدې خوارځواکۍ درملنه یې د درملیزو خوړو په مرسته کېږي. د دغه بنسټ په وینا، د دغو خدماتو موخه د ماشومانو د روغتیايي وضعیت ښه کول او د خوارځواکۍ له امله د مړینې مخنیوی دی. یونیسف تر دې مخکې ویلي وو چې په افغانستان کې له پنځو کلونو کم عمره ۳.۷ میلیونه ماشومان د خوارځواکۍ له ګواښ سره مخ دي.