امریکايي نظامي چارواکي وايي چې دوی له افغانستان څخه خپل ځواکونه وباسي، خو طالبان باید تاوتریخوالی کم کړي. په افغانستان کې د امریکايي او ناټو ځواکونو عمومي قوماندان جنرال سکاټ مېلر ویلي، په دې اړه وروستۍ پرېکړه به د شرایطو پر اساس کېږي او امریکا به هغه وخت خپل ځواکونه له افغانستان څخه وباسي چې د امن او ثبات ډاډ یې تر لاسه کړی وي. تر دې وړاندې ویل شوي وو چې په راتلونکې یوه میاشت کې به دوه زره امریکايي ځواکونه له افغانستان څخه ووځي او ۲۵۰۰ نور به پاتې شي.
د امریکا او طالبانو د هوکړې پر اساس باید ټول بهرني ځواکونه د ۲۰۲۱ ز کال د مې میاشتې تر پایه له افغانستان څخه ووځي. بل خوا امریکايي چارواکي او جنرالان د ځواکونو د وتلو په اړه پرله پسې متفاوتې او متضادې څرګندونې کوي، خو رښتیا د ځواکونو وتل له څه سره تړلي دي؟
د امریکايي ځواکونو د وتلو په اړه څرګندونې رښتیا هم متفاوتې او متضادې دي؛ ځکه چې کله پکې د ځواکونو د وتلو او کله هم د پاتې کېدو خبرې کېږي. کله وتل له شرایطو سره تړلي وي او ډېری وخت خو بېخي هېریږي چې د ځواکونو د وتلو په اړه د طالبانو او امریکا ترمنځ یوه هوکړه شوې ده. له همدې کبله پر څرګندونو ډېر حساب نه کېږي، بلکې په عملي ډول باید وکتل شي چې ځواکونه وځي او که نه. تر اوسه پورې امریکايي ځواکونه په پرله پسې ډول وتلي، ځینې اډې یې خالي کړې او آن خپل تاسیسات یې هم تخریب کړي او ځینې وسایل یې ایستلي دي. داسې ښکاري چې امریکا له طالبانو سره پر هوکړه عمل کوي او تر اوسه پورې د ځواکونو وتل هم د همغو دریو پړاوونو پر اساس دي چې له طالبانو سره پرې هوکړه شوې ده. لومړی پړاو بشپړ شوی، چې پکې ډېر امریکايي ځواکونه وتلي دي. دویم پړاو هم د بشپړېدو په حال کې دی چې پکې به د امریکايي ځواکونو شمېر ۲۵۰۰ ته راکم شي. درېیم پړاو بیا دا دی چې د ځواکونو شمېرې پکې صفر شي. د درېیم پړاو په اړه شک او اندېښنې شته چې امریکايي ځواکونه ښايي یا پکې ځنډ راولي او یا یې هم هېڅ عملي نه کړي او همدا چاره به د طالبانو او امریکا د هوکړې برخلیک ټاکي.
که پاتې امریکايي ځواکونه هم په ټاکلې مرحله کې ونه وځي، نو دا به د هوکړې د نقض مانا ولري او په طبیعي ډول به طالبان هم د هوکړې نقض ته مخه کړي. طالبانو پخوا ویلي وو چې که امریکايي ځواکونه په ټاکلي وخت کې ونه وځي، بریدونه به پرې وکړو او پرون بي بي سي د طالب چارواکو په حواله یو ځل بیا دا خبره تکرار کړې ده. له همدې امله د امریکايي ځواکونو پاتې کېدل د طالبانو او امریکا ترمنځ د جګړې د بیا پیل په مانا ده چې دا چاره نه طالبان او نه هم امریکایان غواړي. طالبان سوله بریا ګڼي او امریکايي ځواکونه که بېرته جګړه پیلوي، نو ډېر ځواکونه یې بېرته باید را وګرځي چې دا چاره امریکا ته ډېره سخته ده او ناوړه پایلې به ولري.
امریکايي ځواکونه باید په ټاکلي وخت کې له افغانستان څخه ووځي او افغان لوري هېڅ داسې څه باید ونه کړي چې د ځواکونو پاتې کېدو ته زمینه برابره کړي. د جګړې کمول، په سوله کې پرمختګ او توافق به له دې سره مرسته وکړي چې ټول امریکايي ځواکونه له افغانستان څخه ووځي. له همدې کبله ټول افغانان باید یو بل ته لاس ورکړي چې امریکايي ځواکونه ووځي او افغانستان خوندي شي.
