زلمی خلیلزاد: تاوتریخوالی او اوسنۍ جګړه ناروا ده، ژر دې اوربند وشي

امریکا په افغانستان کې پر روان تاوتریخوالي اندېښنه ښودلې، له طالبانو او افغان حکومت یې ژر تر ژره د اوربند د رامنځ ته کېدو غوښتنه کړې ده. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي چې په وروستیو کې په افغانستان کې تاوتریخوالی ډېر شوی دی او دوی یې محکوموي. دده په خبره امریکا هغه کسان هم محکوموي چې د تاوتریخوالي او جګړو د غځېدو امر کوي. نوموړي ویلي چې نن سبا د افغانانو وژل عادي شوي دي په داسې حال کې چې طالبانو له امریکا سره د تاوتریخوالي کمولو او اوربند ژمنه کړې ده. خلیلزاد وایي د سولې هوکړې تر لاسلیک وروسته، د کابل اعلامیې تر خپرولو وروسته او دا چې نړیواله ټولنه له افغان سولې ملاتړ کوي دې هر څه ته په کتو په افغانستان کې روانه جګړه نامشروع ده او ښکېلې خواوې دې د خپل ولس غوښتنو ته پام وکړي. نوموړي ویلي چې د طالبانو او افغان حکومت ترمنځ مذاکرات باید چټک شي او اوربند دې تامین شي. هغه یو ځل بیا ټینګار کړی چې دواړه لوري دې د دایمي سولې لپاره رامنځ ته شوی فرصت نه ضایع کوي.