په نیمروز کې په هوايي برید کې د ښځو او ماشومانو په ګډون ۱۸ ملکیان وژل شوي دي. مسوولین وايي، برید یې پر طالبانو کړی، خو خلکو د ښځو، ماشومانو او نورو بې ګناه وکړو مړي د اعتراض په ډول د نیمروز مرکز ته راوړي وو. له دې سره په کابل کې بیا هم چاودنه وه چې د ملي ساتنې تصدۍ د ویاند ضیا ودان په ګډون پکې درې تنه ووژل شول. په ننګرهار کې بیا یو قومي مشر هم په بمي چاودنه کې وژل شوی او د کابل په ګډون په ځینو ولایتونو کې د هدفي بریدونه خبرونه هم ورکړل شوي دي.
د وژنو په دې اوج کې د سولې خبرې بیا پیل شوې دي، خو د تېر په څېر خبري بیا سړې دي او له دواړو اړخونو څخه خبرو ته لېوالتیا کمه ښکاري. داسې ښکاري چې دا وروستۍ وژنې هم پر یو بل د فشار راوړلو او یا هم د سولې پروسې د تخریب لپاره کېږي چې له بده مرغه قربانیان پکې تر ډېره ملکي وګړي، مدني فعالان، ژورنالېستان او یا هغه کسان دي چې خلک پرې حساب کوي او پر وژنه یې ډېر خلک دردیږي.
د جګړې دواړه اړخونه؛ حکومت او طالبان مخامخ له دې امله پړه دي. دوی له یوه اړخه په دغو بریدونو کې ښکېل دي، که پرون په کابل کې چاودنه شوې هم خلک پوهېږي چې چا کړې او که پر ملکي وګړو هوايي برید شوی، هم عاملین یې معلوم دي. د دې تر څنګ دواړه لوري له دې امله هم پړه دي چې ځان مسوولین ګڼي، خو د خلکو د امنیت په تامین کې پاتې راغلي دي. که د طالبانو تر کڼټرول لاندې سیمو کې څوک وژل کېږي، طالب یې د امنيت مسوولیت لري او که په کابل او نورو ښارونو کې خلک وژل کېږي، دولت پړ دی، ځکه چې دولت د خلکو د سرساتنې مسوول دی او باید خپل مسوولیت ترسره کړي.
دا وژنې، دا کرکې او نفرتونه د هېڅ لوري په ګټه نه دي. که په ښار کې بمونه الوځي او یا ترورونه کېږي، د همدې ولس بچیان پکې وژل کېږي او که پر کلیو بمونه غورځي، بیا هم همدا بې ګناه او ډېری غریب او بېچاره ولس پکې ژوند بایلي. دلته اوږده جګړه شوې، ډېر خلک وژل شوي؛ ښځې، ماشومان، سپین ږیري، لوستي، نالوستي، ښاري او کلیوال او هر ډول خلک وژل شوي. دا وژنې نورې باید ودرول شي او په هېڅ ډول یې دوام د زغم وړ نه دی.
اوس چې د سولې خبرې شوې دا ډول بریدونه مخامخ پر سوله ګوزار دی. که ښکېل اړخونه فکر کوي چې په دې ډول پر مقابل لوري فشار راوړي، نو دا بیا د خپل هدف لپاره چټله، ناوړه او ناسمه لاره ده چې هېڅ ډول اسلامي، انساني او افغاني ارزښتونه اجازه نه ورکوي. دواړو اړخونو ته پکار ده چې پر سوله تمرکز وکړي، د سولې د خبرو اوسنی سوړ حالت ختم کړي، ګرمې، جدي او مثبتې خبرې وکړي. د سولې پروسه باید بریالۍ شي او هر څوک چې په دې پروسه کې خنډونه جوړوي، د افغانستان د خلکو دښمنان او د بې ګناه خلکو قاتلین دي چې هرو مرو به ورسره یو وخت حساب کېږي.