په قطر کې د افغان حکومت د مذاکراتي تیم یوه غړي حفیظ منصور ویلي، دوی پرېکړه کړې چې له طالبانو سره د مذاکراتو په دویم پړاو کې له پرمختګ وړاندې باید په افغانستان کې د جګړې د مشروعیت په اړه خبرې وشي. نوموړي ویلي، چې اړتیا ده لومړی د دین پر اساس د جګړې او سولې بحث روښانه شي او وروسته بیا پر نورو موضوعاتو بحث وشي. نوموړي زیاته کړې، تر هغو چې دغه موضوع روښانه نه شي، د سولې خبرې به کومې پایلې ته ونه رسېږي.
شاوخوا لس ورځې کېږي چې افغان مذاکراتي ټیم دوحې ته ورغلی چې له طالبانو سره خبرې وکړي، خو د دواړو اړخونو ترمنځ تر اوسه دوه ځلې خبرې شوې چې پکې د کوم پرمختګ خبر نه دی ورکړل شوی. اوس چې د دواړو اړخونو ترمنځ فضا سړه ده، نو د جګړې د مشروعیت او نه مشروعیت بحث مطرح کېږي. د جګړې د مشروعیت او نه مشروعیت بحث پوره حساس، لانجمن او بې پایلې بحث دی. که د دواړو اړخونو مذاکراتي ټیمونه کلونه کلونه هم بحث وکړي، بیا به هم په دې اړه کومې پایلې ته ونه رسیږي؛ ځکه که طالبان ومني چې جګړه یې نامشروع ده، نو چې تر اوسه یې څومره جګړه کړې، څومره دوی پکې وژل شوي او څومره یې نور وژلي، دا چاره به څنګه توجیه کوي!؟ طالبان نه غواړي چې داسې څه ومني چې د هغو پر اساس یې هر څه تر پوښتنې لاندې راشي. همداسې که حکومتي پلاوی ومني چې جګړه نا مشروع ده، نو بیا خو ټوله کیسه ختمه ده. د جګړې د مشروعیت او نه مشروعیت بحث له ۲۰۰۱ کال راهیسې را روان دی چې طالبان د خپلو دیني عالمانو او ملاتړو پر مټ دا نه یوازې مشروع ګڼي، بلکې جهاد او فرض یې ګڼي، خو حکومت یې د خپلو دیني عالمانو او دیني ملاتړو پر مټ ناروا او ناسمه ګڼي. په کور دننه له ځینو دیني عالمانو نیولې بیا د ځینو نورو هېوادونو تر دیني عالمانو او آن د حرمینو شریفینو تر امامانو پورې ځینو کسانو په افغانستان کې جګړه نامشروع وګڼله، خو دغو بحثونو او فتواوو د جګړې له درېدو او آن کمښت سره هېڅ مرسته ونه کړه. له همدې امله د جګړې د مشروعیت او نه مشروعیت بحث په هېڅ ډول نه ګټور دی او نه هم کومه مثبته پایله لري.
که خبره دا وي چې جګړه ودرول شي او یا هم اوربند وشي، د دې لپاره باید د جګړې د مشروعیت او نه مشروعیت بحث ونه شي، بلکې په سیاسي توافقاتو کې داسې پرمختګونه وشي چې اوربند او بالاخره د جګړې ختم ته لاره هواره کړي. پر داسې مسایل بحث چې نه ګټه لري او نه هم پای، د سولې پر پروسه منفي اغېز کوي او پکار ده چې ونه شي. د سولې لپاره دواړه اړخونه باید پر هغو مسایلو بحث وکړي چې په اسانۍ توافق پرې کېدلی شي. په دې خبرو کې باید پرمختګ وشي، دا پرمختګ که کوچني هم وي، خو باید وشي، ورو ورو باید دا پرمختګ زیات شي چې ورسره سوله راشي او جګړه یو مخ ختمه شي.