په هېواد کې د تاوتریخوالي د ډېرېدو په دوام یوازې تېره ورځ په کابل کې څلور چاودنې شوې دي. پرون له سهاره تر مازیګره کابل ښار څو څو ساعته وروسته د ماینونو د چاودنو شاهد و. په دغو چاودنو کې لسو کسانو ته مرګ ژوبله اوښتې، چې په دې ډله کې د هېواد یو علمي او فرهنګي شخصیت هم وژل شوی دی. د چاودنو مسوولیت تر اوسه هېڅ لوري نه دی منلی او طالبانو هم په دې پېښه کې لاس لرل رد کړي دي. افغان حکومت یې بیا د طالبانو کار بولي او نړیوال هم په افغانستان کې د هدفي بریدونو پر ډېرېدو اندېښنه ښيي.
کابل ښاریانو پرون سهار په چاودنه پيل کړ. شاوخوا اته بجې وې چې د کابل ښار د دویمې ناحیې په مربوطاتو کې له جوی شیر نومې سیمې سره د امنیتي کسانو پر یو فورډ ډوله موټر د مقناطیسي ماین چاودنه وشوه. په چاودنه کې د امنیتي سرچینو په وینا، دوه کسه ټپیان شول. دویمه چاودنه د کابل ښار د څلورمې ناحیې اړوند له سلیم کاروان نومې سیمې سره وشوه چې د امنیتي سرچینو په خبره، په پېښه کې دوه کسان وژل شوي او دوه نور ټپیان دي. د دې چاودنې په وژل شوو کې د هېواد وتلی دیني عالم دوکتور محمد عاطف هم شامل و. د نوموړي وژل کېدو له حکومت نیولې بیا تر طالبانو پورې د ټولو اړخونو غبرګون له ځان سره درلود.
د وسله والو طالبانو له لوري یوازې تر چاودنې څو ساعته وروسته مطبوعاتي اعلامیه خپره شوه او د دې ډلې ویاند ذبیح الله مجاهد پر دوکتور محمد عاطف شوې چاودنه په کلکو ټکو غندلې وه او هغه یې د ځانګړې خبیثه کړۍ کار بللی و. د طالبانو ویاند همدا راز ویلي چې دوی په افغانستان کې د خبریالانو، سیاسي څېرو، مدني فعالینو او دیني علماوو په وژنه کې لاس نه لري، بلکې دا د یوې خبیثې او استخباراتي کړۍ کار دی. د ده په وینا: «په خواشنۍ سره خبر شوو چې د استخباراتي وژنو په لړ کې، نن سهار په کابل کې د جمعیت اصلاح د مرکزي شورا ریيس محمد عاطف په شهادت رسېدلی. موږ د عالماوو، خبریالانو، سیاسي او اجتماعي شخصیتونو ترور غندو او د خاصې خبیثه کړۍ کار يې بولو».
دوکتور محمد عاطف کلونه د افغانستان په شخصي او دولتي پوهنتونونو کې په تدریس بوخت و او دمګړۍ د جمعیت اصلاح افغانستان د مرکزي شورا رییس و. د نوموړي پر وژل کېدو ولسمشرۍ ماڼۍ هم غبرګون ښودلی دی. د ارګ له مطبوعاتي دفتره په خپره شوې اعلامیه کې راغلي، چې د هېواد دښمنانو د خپلو جنایتونو په دوام دا ځل پر دوکتور محمد عاطف برید کړی دی. ولسمشرۍ ماڼۍ په خپلو خبرو کې دا د طالبانو کار بللی او پر دغه ډله یې غږ کړی چې د سولې له لارې خپله لار وپالي او د جګړو پر مټ موخو ته نه شي رسېدلی. د سرچینې په خبره: «د طالبانو ډله باید دا درک کړي چې د تاوتریخوالي، ترور او وحشت له لارې نه د خپلو بادارانو شومو موخو ته رسېدلی شي، نه د جنایتونو له مسوولیت څخه خپلې اوږې سپکولی شي او نه هم دیني علما د ترهګرۍ ضد اسلامي او ملي دریځ څخه اړولی شي».
د یادو شوو چاودنو ترڅنګ غرمه مهال د کابل ښار په دهمزنګ سیمه کې او بیا مازیګر مهال د کابل ښار د اتمې ناحیې اړوند سیمه کې هم چاودنې شوې چې له امله یې څلور کسان ټپیان شوي دي.
په کابل ښار کې داسې مهال د مقناطیسي ماینونو او هدفي وژنو کچه لوړېږي چې تازه سیګار هم پر دې موضوع اندېښنه ښودلې ده. د افغانستان پر بیا رغونه د امریکا دغه ځانګړي مفتش په خپل یوه راپور کې ویلي چې په وروستیو کې په کابل او نورو ولایتونو کې پر خبریالانو، حکومتي چارواکو، مدني فعالینو او علماوو د داعش ډلې او طالبانو هدفي بریدونه ډېر شوي دي. سرچینه وایي، تمه لري چې امریکا به پر طالبانو د فشار له لارې په افغانستان کې تاوتریخوالی کم کړي او هدفي بریدونه به پای ته ورسوي.