په کابل ښار کې پرون بیا هم وژونکې پېښې وشوې. تر ټولو وژونکې او خونړۍ پېښه د کابل په پنځمه حوزه کې وه چې د وردګو د کلیو او پراختیا د رییس په ګډون پکې څلور کسان ووژل شول او څو نور ټپیان شول. په کابل ښار کې نږدې هره ورځ د چسپکي ماینونو چاودنې او بریدونه کېږي چې حکومت یې په مخنیوي کې پاتې راغلی دی. د کابل په ډېرو برخو کې بریدونه کېږي، خو پنځمه حوزه تر ټولو نورو خونړۍ او وژونکې ده. له چسپکي ماینونو نیولې تر هدفي وژنو، غلاوو او نورو جرمونو پورې، په دې حوزه کې هر څه روان دی.
حکومتي چارواکو تل په کابل ښار کې د چاودنو، بریدونو او ناامنیو د مخنیوي ژمنې کړې دي، د پنځمې حوزې په اړه یې ژمنې ځانګړې هم وې، خو نه یې د ټول کابل ښار او نه یې هم د پنځمې حوزې په اړه ژمنې عملي کړې دي. د دې سیمې اوسېدونکي او د پېښو څارونکي وايي چې تر بلې هرې سیمې دلته بریدونه، وژنې او ناقانونۍ ډېرې دي، خو حکومت لاس تر زنې ناست دی. په دې سیمه کې د وردګو قومي شورا څو میاشتې وړاندې ویلي وو چې یوازې د وردګو قوم ۸۷ مخور او کادرونه په دې حوزه کې وژل شوي دي. د دې تر څنګ ګڼ نور خلک هم په نښه شوي چې کره شمېرې یې نشته.
داسې ښکاریږي چې پنځمه حوزه د حکومت د پوره واکمنۍ سیمه نه ده، ځکه پکې دا ډول پېښې کېږي. کله خو د پېښو زیاتوالی او ډول داسې وي چې د سیمې خلک فکر کوي حکومت دا سیمه وسله والو مخالفینو، ناقانونه وسله والو، نورو ورانکارو ډلو، غلو او وژونکو ته ور پرې اېښې ده او پر دې سیمه یې د هغوی واکمني منلې ده. یا هم د حکومت چلند داسې دی چې په دې سیمه کې د نا امنیو، وژنو او غلاوو له لاملینو سره د ټکر او د هغوی د مخنیوي وړتیا نه لري او یا هم نه غواړي چې مخه یې ونیسي. یوازې وسله وال مخالفین په دې سیمه کې فعال نه دي، بلکې تر ډېره ناقانونه وسله والې ډلې، غله او وژونکي چې په سیاسي مشرانو پورې اړه لري، په دې سیمه کې فعال دي. حکومت خو یا له دې سیاسي مشرانو سره معاملې لري او د هغوی د سیاسي ملاتړ په بدل کې یې پنځمه حوزه هغوی ته ور پرې اېښې ده او یا هم نه غواړي چې د غلو، وژونو او ناقانونه وسله والو پر ضد په ګام اخیستلو سره هغوی خپه کړي.
پنځمه حوزه اوس خونړۍ ده، هره ورځ پکې خلک وژل کېږي او نورې پېښې کېږي، خو حکومت یې پر وړاندې غلی دی. حکومتي چارواکي تېروتنه کوي، ځکه چې که پنځمه حوزه ناامنه شي او دلته وسله وال مخالفین واکمن وي، نو ټول کابل ګواښلی شي. همدا وس وخت دی چې حکومت پنځمې حوزې ته پام وکړي، هلته د وژونو، غلاوو او نورو ناقانونه کړنو مخه ونیسي او سیمه امن کړي. له دې پرته به نه یوازې بیا پنځمه حوزه له کنټروله وتلې وي، بلکې ټول کابل به یې نا امن کړی وي.