ملګرو ملتونو په افغانستان کې د روانو جګړو د ملکي تلفاتو راپور خپور کړی دی. د ملګرو ملتونو مرستندویه دفتر په کابل کې په دې خپاره کړي راپور کې ویلي، چې د بین الافغاني خبرو له پيل سره هممهاله ملکي تلفات لوړ شوي او جګړې هم شدیدې شوې دي. یوناما د ملکي مرګ ژوبلې د لویې برخې مسوولین وسله وال طالبان بولي، خو طالبان بیا دغه راپور ردوي. افغان حکومت هم پر دې راپور غبرګون ښودلی او وایي چې طالبان د لوړې سلنې مرګ ژوبلې مسوول دي.
په افغانستان کې د ملګرو ملتونو مرستندویه دفتر یا یوناما وایي چې تېر ۲۰۲۰ز کال په لومړیو کې د سولې لپاره له هیلو ډک کال و او میلیونونه افغانانو دا تمه لرله چې ګواکې په افغانستان کې به روانه جګړه پای ته رسېږي، خو وضعیت د خلکو د تمې پرخلاف خونړی شو. د سرچینې په خبره، سره له دې چې ملکي مرګ ژوبله د تېر کال په پرتله په دې کال کې کمه ده، خو د بین الافغاني خبرو او دوحې هوکړې تر لاسلیک وروسته په افغانستان کې د ملکي وګړو تلفات ډېر شوي دي.
په راپور کې راځي چې د تېر ۲۰۲۰ز کال له جنورۍ بیا د ډسمبر تر میاشتې پورې ټولټال ۸۸۲۰ ملکیانو ته مرګ ژوبله اوښتې ده. سرچینه کاږي چې له دې ډلې (۳۰۳۵) مړه او (۵۷۸۵) نور کسان ټپیان شوي دي. دوی د ملکي تلفاتو ستر لامل په ښارونو او کلیو کې د طالبانو بریدونه او د بهرنیو ځواکونو بمبارۍ یادوي. سرچینه کاږي چې طالبان د شاوخوا ۴۶ سلنې مرګ ژوبلې مسوولین دي. د ملګرو ملتونو په دې راپور کې بیا حکومت د ۲۲ سلنې ملکي تلفاتو مسوول بلل شوی دی.
په افغانستان کې د ملګرو ملتونو د مرستندویه دفتر مشرې دبورا لاینز بیا د دغه راپور د خپرولو پر مهال له ښکېلو لورو غوښتي چې ژر تر ژره تاوتریخوالی کم کړي. د نوموړې په خبره، د دغه راپور له خپرولو یې موخه دا ده چې ښکېلې خواوې د ملکي وګړو خوندیتوب ته وهڅوي او له دوی وغواړي چې په افغانستان کې روانې جګړې ته د پای ټکی کېږدي او ژر تر ژره اوربند وکړي. د لاینز په وینا: «د دغه مهم راپور اصلي موخه مسوولو خواوو ته د واقعیتونو او سپارښتنو وړاندې کول دي، دوی باید ملکیانو ته د زیان رسېدو د مخنیوي په برخه کې فوري ګامونه اوچت کړي. له دوی غواړم چې د اقداماتو په ترسره کولو ژر تر ژره د لا ډېرو رنځونو مخه ونیسي».
په افغانستان کې د ملګرو ملتونو مرستندویه دفتر همدا راز پر ښکېلو لورو غږ کړی، چې ژر تر ژره د سولې خبرو ته ادامه ورکړي او په دې فکر وکړي چې څنګه کولی شي دلته اوسنی تاوتریخوالی چې تر ټولو ډېر زیان یې ملکي وګړو ته اوړي، له منځه یوسي. د سرچینې په خبره، ملګري ملتونه په افغانستان کې د سولې د خبرو ملاتړ کوي، خو دغه خبرې باید د تاوتریخوالي د کمېدو سبب شي.
بلخوا طالبانو او حکومت دواړو د یوناما پر دغه راپور غبرګون ښودلی دی. د وسله والو طالبانو له لوري په خپره شوې اعلامیه کې راغلي چې دغه راپور یو اړخیز دی او یوناما یوازې د افغانستان د استخباراتي او امنیتي ادارو ارقام او خبرې اورېدلې دي. د دوی په وینا، د ملکي وګړو د مرګ ژوبلې اصلي مسوولین افغان حکومت او همدا راز بهرني عسکر دي چې د عامو وګړو کورونه یې بمبار کړي دي. په اعلامیه کې راځي چې راپور د غلطو معلوماتو پر بنسټ جوړ شوی او دوی یې ردوي.
له دې سره جوخت د افغان حکومت د ملي امنیت شورا هم پر دې راپور غبرګون ښودلی دی. دغه شورا وایي، دوی د نړیوالو ادارو د ورته اقداماتو ستاینه کوي چې د ملکي وګړو د مرګ ژوبلې د مخنیوي لپاره هلې ځلې کوي، خو په دې راپور کې طالبان د زیات مرګ ژوبلې مسوولین دي، ځکه د دوی تر پوښښ لاندې ګڼې ترهګرې ډلې دلته فعالیت کوي او ملکي افغانانو ته تلفات اړوي. ملګري ملتونه داسې مهال دغه راپور خپروي چې لا هم په افغانستان کې خونړۍ جګړه روانه ده او عام افغانان له دې جګړې ستړي شوي او له نړیوالو دلته د سولې راوستو هیله لري.
