رهنورد پوهنتون چې په مزارشریف ښار کې موقعیت لري، په ۱۳۹۳ کال کې یې د لوړو زده کړو موسسې په چوکاټ کې پر فعالیت پیل کړی دی. د رهنورد پوهنتون د علمي معاون او اوسني سرپرست ښاغلي امان الله شفاهي په وینا، دوی له پیل راهیسې د دریو پوهنځیو: معالجوي طب، ستوماتولوژۍ او حقوقو او سیاسي علومو په چوکاټ کې خپلې چارې پر مخ بېولې، خو په ۱۳۹۴ کال کې یې د ښوونې او روزنې پوهنځی هم رامنځته کړ. ښاغلي شفاهي زیاته کړه، دوی اوسمهال ټول څلور پوهنځي لري چې د ډېپارټمنټونو شمېر یې په دې ډول دی: حقوقو او سیاسي علومو پوهنځی دوه ډېپارټمنټونه، ښوونې او روزنې پوهنځی اووه ډېپارټمنټونه، معالجوی طب پوهنځی پنځه ډېپارټمنټونه او ستوماتولوژي پوهنځی هم دوه ډېپارټمنټونه لري.
ښاغلي شفاهي زیاته کړه، اوسمهال په رهنورد پوهنتون کې ټول ۳۲۵۰ محصلین په فعال ډول پر زده کړو بوخت دي، چې له دې ډلې له ۶۰ تر ۶۵ سلنې پورې هلکان او پاتې ۳۰ تر ۳۵ سلنې پورې یې ښځینه محصلینې تشکیلوي.
د ښاغلي شفاهي په خبره، رهنورد پوهنتون په ۱۳۹۷ کال کې له لوړو زده کړو موسسې څخه پوهنتون ته ارتقاع وکړه.
د رهنورد پوهنتون سرپرست ښاغلي امان الله شفاهي وویل، دوی د ماسټرۍ پروګرام د رامنځته کولو لپاره د لوړو زده کړو وزارت له قوانینو سره سم د اعتبار ورکړې دوې پروسې پای ته رسولې او د درېیمې هغې په بشپړولو سره به رهنورد د لوړو زده کړو موسسه د ماسټرۍ پروګرام هم ولري.
ښاغلي شفاهي همدا راز زیاته کړه، د رهنورد پوهنتون د فارغ شوو محصلینو شمېر نظر پوهنځيو ته توپیر کوي، داسې چې د حقوقو او سیاسي علومو له پوهنځي څخه یې تر دې دمه په خپلو څلورو- پنځو دورو کې له ۲۵۰۰ څخه تر ۳۰۰۰ پورې محصلین فارغ کړي دي او د یاد پوهنځي د فراغت لړۍ له ۱۳۹۶ کال څخه پیل شوې ده. د معالجوي طب پوهنځی یې سږ کال لومړۍ دوره محصلین فارغوي او له ستوماتولوژي پوهنځي څخه یې تر دې مهاله په دوو دورو کې محصلین فارغ کړي او له ښوونې او روزنې پوهنځي څخه یې هم له پیله تر اوسه په یوه یا دوو دورو کې محصلین فارغ کړي او ټولنې ته یې د خدمت په موخه وړاندې کړي دي.
ښاغلي شفاهي همدا راز وویل، دوی هر کال په مختلفه کچه نوي محصلین جذبوي، په تېرو کلونو کې د ځوانانو لېوالتیا او د هغوی اقتصادي او د ژوند شرایطو ته په کتو د نوو محصلینو د جذب شمېر نسبت اوس وخت ته ډېر و، داسې چې په ۱۳۹۶ کال کې یې شاوخوا ۳۰۰۰ نوي محصلین جذب کړل، په ۱۳۹۷ کال کې یې له ۲۰۰۰ څخه تر ۲۵۰۰ پورې، په ۱۳۹۸ کال کې له ۱۵۰۰ څخه تر ۱۶۰۰ تنو او په ۱۳۹۹ کال کې یې هم ۱۳۵۰ نوي محصلین جذب کړي دي چې د تېرو کلونو په پرتله یې شمېر یو څه کم دی.
ښاغلي شفاهي زیاته کړه، دوی د محصلینو مالي او اقتصادي حالت او د پوهنتون د څېړنیز ټیم پرېکړو ته په کتو د تخفیف په برخه کې تصمیم نیسي او خپلو محصلینو ته په مختلو کچو تخفیف وړاندې کوي.
د رهنورد پوهنتون یاد مسوول وايي، دوی خپلو پوهنځیو ته په کتو درسي ټایمونه ترتیب کړي دي، داسې چې د حقوقو او سیاسي علومو پوهنځی یې هم په سهارنۍ او هم په ماښامنۍ دوره کې درسي چارې پر مخ بیایي، خو پاتې درې نور پوهنځي یې بیا یوازې په یوه درسي ټایم کې خپلې چارې پر مخ بیایي چې د سهار له اتو بجو پیل او وروسته له غرمې په دریو بجو پای ته رسېږي.
ښاغلي شفاهي همدا راز وویل، دوی په رهنورد پوهنتون کې د خپلو محصلینو لپاره یو مجهز او بډایه کتابتون لري، چې شاوخوا شل زره جلده کتابونه پکې شته او په یوه وخت شاوخوا پنځوس محصلین کولای شي مطالعه پکې وکړي او خپل د اړتیا وړ مالومات ترې تر لاسه کړي. نوموړي زیاته کړه، دوی پر دې کتابتون سربېره له پوهنتونه د باندې یو بل کتابتون هم لري چې شاوخوا ۱۵۰۰۰ جلده کتابونه لري او پر محصلینو سربېره ښاریان او هېوادوال کولای شي ګټه ترې واخلي او وخت ناوخت مطالعه پکې وکړي.
ښاغلي امان الله شفاهي زیاته کړه، دوی په هېواد کې د ننه په ځانګړې توګه په مزارشریف ښار کې له ډېرو خصوصي پوهنتونونو او د بلخ ولایت له دولتي پوهنتون سره نېکې او اکاډمیکې اړیکې لري او همدا راز له هېواده د باندې له ځینو ترکي او قزاقستاني پوهنتونونو سره هم د متقابلو اړیکو او همکاریو تفاهم لیکونه لري.
د ښاغلي شفاهي په وینا، د رهنورد پوهنتون فارغ شوو محصلینو ته د لوړو زده کړو وزارت لخوا ثبت او راجستر شوي اسناد ورکړل شوي دي او د همدې اسنادو د شتون پر بنسټ د دوی ډېری محصلین د کار په بازار کې پر دندو بوخت دي او ځینې نور یې هم د ماسټرۍ او لوړو زده کړو د دوام په موخه له هېواده د باندې تللي دي.
د رهنورد پوهنتون سرپرست امان الله شفاهي همدا راز وویل، دوی په هره پوهنځي کې په مختلفه کچه استادان لري، د نوموړي په وینا، په معالجوي طب پوهنځي کې له ۱۰۰ څخه زیات استادان لري، په حقوقو او سیاسي علومو پوهنځي کې له ۳۰ څخه زیات او په ښوونې او روزنې پوهنځي کې هم له ۲۵ تر ۳۰ پورې استادان لري. د نوموړي په وینا، په ټوله کې رهنورد پوهنتون شاوخوا ۲۰۰ استادان لري چې په فعال ډول محصلینو ته تدریسي چارې پر مخ وړي. نوموړی زیاتوي، له دې استادانو څخه شاوخوا ۷۰ سلنه یې د ماسټرۍ تر کچې لوړې زده کړې لري او پاتې نور یې لسانس دي.
ښاغلي شفاهي زیاته کړه، دوی په رهنورد پوهنتون کې خپلو محصلینو ته د پام وړ خدمتونه او اسانتیاوې وړاندې کوي، له دې ډلې کولای شو مجهز کمپیوټر لب، مجهز کتابتون، د معالجوي طب او ستوماتولوژي پوهنځیو د محصلینو لپاره پرمختللي او مجهز لابراتوارونه او د عملي کار خونو ته اشاره کولای شو. پر دې سربېره، مجهز ټولګي، ارامه فضا او مجهز درسي امکانات هغه اسانتیاوې دي چې په رهنورد پوهنتون کې د محصلینو په واک کې ورکړل شوي دي.
ښاغلي شفاهي همدا راز وویل، دوی د پوهنتون د پرمختګ او لا بډاینې لپاره ځینې پلانونه لري چې تمه ده په نږدې راتلونکي کې به پلي شي، لکه د اعتبار ورکړې د درېیمې مرحلې بشپړول، پر یوه معیاري او نړیوال پوهنتون باندې بدلېدل، د ماسټرۍ پروګرام رامنځته کول او داسې نور هغه پلانونه دي چې په نږدې راتلونکي کې به یې عملي کړي.
په پای کې ښاغلي امان الله شفاهي زیاته کړه، دوی له دولت او په ځانګړې توګه له لوړو زده کړو وزارت څخه غواړي څو د خصوصي پوهنتونونو لپاره لا ډېره پاملرنه وکړي، ملاتړ یې وکړي او یاد ملاتړ او پاملرنه یې باید ټول شموله وي. همدا راز ښاغلي شفاهي په خپلو خبرو کې د ځینو هغو نیمګړتیاوو په هکله وویل، چې په پوهنتون کې یې لري، لکه د څېړنو د برخې پياوړي کول، د کتابتون لا بډایه کول، د تخفیف په برخه کې لا ډېرې اسانتیاوې رامنځته کول، ځکه چې یادې موسسې ته ډېر محصلین مراجعه کوي او ډېری له دوی څخه د لوړو زده کړو د دوام په خاطر مالي او اقتصادي توان نه لري او داسې نورې کوچنۍ ستونزې چې د نوموړي په وینا په نږدې راتلونکي کې به حل شي.