نیویارک پوسټ: د امریکا هوایي بریدونه ښایي تر اوږدې مودې دوام وکړي

ښايي امریکا تر اوږدې مودې پورې په افغانستان کې هوایي بریدونو ته ادامه ورکړي. نیویارک پوسټ نشریې په یوه مطلب کې لیکلي دي چې د امریکا جنګي الوتکې په عرب سمندرګي کې له ولاړې نظامي بېړۍ او په قطر کې د امریکا له سترې نظامي اډې پروازونه کوي او په افغانستان کې هوایي بریدونه ترسره کوي. سرچینه وایي امریکا په دې باور ده چې په دې توګه د طالبانو د پرمختګ مخه نیولی شي. بلخوا ځینو امریکايي سرچینو دغه نشریې ته ویلي چې په اګسټ کې د ټولو امریکايي عسکرو تر وتلو وروسته هم د امریکا هوایي بریدونه ادامه کوي. د سرچینې په خبره ښایي د امریکا هوایي بریدونه تر اوږدې مودې ادامه ولري، ځکه طالبان د پرمختګ په لټه کې دي او پر جګړو ټینګار کوي، نو دوی یې باید مخنیوی وکړي. بلخوا امنیتي کارپوهان بیا په دې باور دي چې د امریکا هوایي بریدونه به په ښارونو کې ناورین رامنځ ته کړي او د افغانانو د قتل عام سبب به شي.