سعودي کابل کې د بندپاتې افغان مسافرو د اقامې نیټه غزوي

د سعودي عربستان حکومت پرېکړه کړې ده چې د هغو افغان مسافرو د اقامو نیټې وغځوي چې تر وروستیو تحولاتو وروسته په افغانستان کې بند پاتې دي. کابل کې د سعودي سفیر الاسناد مشعل الشمري د کنسولي چارو له رییس مولوي محمد شفیق خطیب سره په لیدنه کې ویلي، چې دوی په سیستماتیک ډول کابل کې د ایسارو افغان مسافرو لپاره د اقامې نېټې غزوي. هغه زیاته کړې ده چې تر څو چې د افغانستان وضیعت عادي حالت ته نه وي ګرځېدلی او د کرونا وبا نه وي ختمه شوې هېڅ افغان مسافر ته د اقامې ختمېدو خطر نشته دی. هغه څرګنده کړې ده چې د افغانستان عامې روغتیا وزارت دې د بهرنیوچارو وزارت په منځګړیتوب د عربستان د بهرنیوچارو وزارت ته یو مکتوب ولېږي، څو په کابل کې د بند پاتې افغان مسافرو د کرونا واکسین کارتونه تایید کړي، چې ورسته بیا په درېیم هېواد کې له ۱۴ورځو قرنطین خلاص او د انتقال بهیر یې پیل شي.