شاوخوا درې سوه هغه افغانان چې څو میاشتې وړاندې د امریکا له لوري د تخلیې په پروګرام کې متحده عربي اماراتو ته لېږدول شوي وو، بېرته هېواد ته راګرځېدلي دي. دا درې سوه کسان چې د اماراتو په ابوظبۍ ښار کې په یوه نظامي کمپ کې اوسېدل وایي چې هلته وضعیت له هره اړخه ډېر خراب و، نو ځکه بېرته راغلي دي. د راپورونو له مخې، په بېرته راغلو افغانانو کې یو شمېر داسې کسان هم شته چې له امریکایي او غربي ادارو سره یې په نظامي او ملکي برخه کې کار کړی دی. امریکا له افغانستان څخه زرګونه کسان ایستلي چې یوه برخه یې لا هم په البانیا، ابوظبۍ، یوګنډا، المان او قطر کې د امریکا په نظامي کمپونو بې برخلیکه پراته دي. یوازې په متحده عربي اماراتو کې ۱۲ زره داسې کسان پراته دي چې څو ځله یې لاریونونه هم کړي دي، خو څوک یې غږ نه اوري او دا دی ځینې یې بېرته افغانستان ته را ګرځي.
افغانستان ته را ګرځېدل په هر حال ښه پرېکړه ده او پکار ده نور هغه کسان هم چې په نظامي کمپونو کې بې برخلیکه پراته دي افغانستان ته را وګرځي. دا سمه ده چې دلته وزګارتیا او اقتصادي ستونزې شته او ښايي ځیني له دې کبله له افغانستان څخه وتلي وي، خو ډېری داسې کسان هم شته چې هېڅ ډول اقتصادي ستونزه نه لري، خو بیا هم له هېواده وتلي دي. دوی فکر کاوه چې د تېر کار او ماموریت له کبله به وځورول شي، نو ځکه یې هېواد پرېښود، خو له څو میاشتو وروسته اوس ښکاري چې دا وېره بې ځایه وه. دا سمه ده چې ځینې داسې پېښې شوي چې خلک د تېر ماموریت له کبله وځورول شي، خو دا پېښې ډېرې لږې دي. اوس چې ورځ تر بلې حالت ښه کېږي، نو هغه خلک چې یوازې له دې وېرې یې هېواد پرې اېښی و، پکار ده چې له دې موقع استفاده وکړي، په کمپونو او پردیو هېوادونو کې سخت او د ذلت ژوند پرېږدي او په خپل هېواد کې بېرته د عزت ژوند او کار پیل کړي. حیرانوونکې خو دا ده چې په دغو کمپونو کې داسې کسان هم پراته دي چې نه له سیاسي اړخه په افغانستان کې ستونزه لري او نه هم له اقتصادي اړخه، خو بهر ته د تللو شوق او هلته د ژوند مینې دوی د امریکا تر نظامي کمپونو رسولي دي او هلته سخت او ذلیل ژوند تېروي. دوی ته پکار ده چې نور له دې شوقه تېر شي او څه ډول چې دا درې سوه کسان را وګرځېدل، داسې دوی هم را وګرځي.
دا طبعي هم ده چې افغانان به بېرته هېواد ته راګرځي، ځکه چې ډېری یې له خپل وطن سره نه شلېدونکې اړیکه لري، خو اسلامي امارت ته هم پکار ده چې د دوی هرکلی وکړي، دلته یې د ستونزو په حل کې مرسته وکړي او تر ممکنه بریده ورسره د کار او دندې په برخه کې هم مرسته وکړي. په دې ډول به هم زیات افغانان خپل هېواد ته راشي او هم به اسلامي امارت د یوه مسوول دولت په شان عمل کړی وي.